හෙරොයින් මත්කුඩු සමඟ අත්අඩංගුවට ගත් පුද්ගලික ආයතනයක විද්‍යාගාර සහායකවරයා කුලියාපිටිය මූලික රෝහලේ අධිකරණ වෛද්‍ය නිලධාරී නිල කාමරයේ ජනේලයෙන් පැන පලා ගොස් ඇතැයි දුම්මලසූරිය පොලිසිය කියයි.
මෙලෙස පලා ගොස් ඇත්තේ උඩුබද්දාව කහදෙනිගම පදිංචි වයස අවුරුදු 30ක පුද්ගලයෙකි.
දුම්මලසූරිය පොලිසියේ නිලධාරීන් කණ්ඩායමක් හෙරොයින් මත්කුඩු සමඟ අත්අඩංගුවට ගත් සැකකරු අධිකරණය වෙත ඉදිරිපත් කර රැඳවුම් නියෝග ලබා ගැනීමට පෙර
සැකකරු සම්බන්ධයෙන් වෛද්‍ය වාර්තාවක් මහේස්ත්‍රාත්වරයා වෙත ඉදිරිපත් කිරීම සඳහා සැකකරු අධිකරණ වෛද්‍ය නිලධාරිවරයා වෙත ඉදිරිපත් කර තිබූ බව පොලිසිය කියයි.
සැකකරු කැටිව පොලිස් සැරයන්වරයකු සහ කොස්තාපල්වරයකු අධිකරණ වෛද්‍යවරයාගේ කාමරය වෙත ගොස් ඇති අතර, අත්විලංගු ඉවත් කර පොලිස් නිලධාරීන්ට කාමරයෙන් පිටත රැඳී සිටින ලෙස අධිකරණ වෛද්‍ය නිලධාරිවරයා උපදෙස් ලබා දී ඇතැයි පොලිසිය කියයි.
ඒ අනුව පොලිස් නිලධාරීන් දෙදෙනා නිල කාමරයෙන් පිටත රැඳී සිටියදී සැකකරුව වෛද්‍ය නිලධාරිවරයා පරීක්ෂා කරමින් සිට ඇති අතර, සැකකරු එකවරම අධිකරණ වෛද්‍ය කාමරයේ ජනේලයෙන් පිටතට පැන පලා ගොස් ඇති බව පොලිස් නිලධාරියෙකු පැවසීය.
සැකකරු අත්අඩංගුවට ගැනීම සඳහා දුම්මලසූරිය පොලිසිය පරීක්ෂණ පවත්වයි.
බණ්ඩාරගම – බිමල් ජයසිංහ
Sri News
