ඕස්ට්‍රේලියාවේ පාරිභෝගික නිරීක්ෂකයින් විසින් කරන ලද පරීක්ෂණයකින් පසු දුර්වල සේවාවන් නිසා විවේචනයට ලක්ව ඇති Qantas ගුවන්සේවා සමාගම විශාල වන්දියක් ගෙවා ඇති බව විදෙස් මාධ්‍ය වාර්තා කරයි. අවලංගු කර ඇති ගුවන් ගමන් සඳහා ටිකට්පත් විකිණීම සම්බන්ධයෙන් වූ ඔවුනගේ නඩුවක් සමථයකට පත් කිරීම සඳහා ඩොලර් මිලියන 79 ක් ගෙවීමට Qantas එකඟ වී තිබේ.
2021 මැයි සිට 2022 ජූලි දක්වා කාලය තුළ අවලංගු කරන ලද ගුවන් ගමන් 8,000 කට වැඩි ප්‍රමාණයක් සඳහා ප්‍රවේශපත්‍ර ප්‍රචාරණය කිරීම සහ අලෙවි කිරීම සම්බන්ධයෙන් ඕස්ට්‍රේලියානු තරඟකාරී සහ පාරිභෝගික කොමිසම Qantas වෙත චෝදනා කළේය. ගුවන් සමාගම එම චෝදනා පිළිගෙන පීඩාවට පත් ගනුදෙනුකරුවන් 86,000 කට අධික පිරිසකට වන්දි ගෙවීමට හා දඩ ගෙවීමට එකඟ විය. Qantas හි ප්‍රධාන විධායක නිලධාරී වැනේසා හස්ඩන් පාරිභෝගිකයින්ට සිදු වූ අපහසුතාවයට සමාව අයැද සිටින අතර අනාගතයේදී එවැනි ගැටලු වළක්වා ගැනීම සඳහා ගුවන් සමාගම සිය ක්‍රියාවලීන් යාවත්කාලීන කර ඇති බව පැවසීය.
විශ්වාස කළ නොහැකි ගුවන් ගමන්, ඉහළ ප්‍රවේශපත්‍ර මිල ගණන් සහ විධායක වැටුප් පිළිබඳ මතභේද රැසක්ද, Qantas සම්බන්ධයෙන් මෑතකාලීනව වාර්තාවී තිබේ. නීතිවිරෝධී දොට්ට දැමීම් සහ දුර්වල පාරිභෝගික සේවාවක් සම්බන්ධයෙන්ද ගුවන් සමාගම විවේචනයට ලක්ව ඇත. පාරිභෝගික නිරීක්ෂකයින් සමඟ ඇති කර ගත් ගිවිසුම ඕස්ට්‍රේලියාවේ ජාතික ගුවන් සේවය ලෙස Qantas කෙරෙහි විශ්වාසය යළි ගොඩනැගීමේ පියවරක් ලෙස සැලකේ. ගුවන් සමාගමේ ප්‍රධාන විධායකවරයා මෙම වන්දිගෙවන යෝජනාව සමාගම කෙරෙහි විශ්වාසය නැවත ඇති කිරීමේ වැදගත් සන්ධිස්ථානයක් ලෙස හැඳින්වීය.
Sri News
