හිටපු යුද හමුදා සෙබළෙකුට අතින් පයින් සහ පොලුවලින් පහර දී ඝාතනය කර ඇති බව තෙබුවන පොලිසිය පවසනවා.
මෙලෙස ඝාතනයට ලක්ව ඇත්තේ තෙබුවන, තලහිටිය, බේගමුව ප්‍රදේශයේ පදිංචිව සිටි ශානක කුරුප්පුආරච්චි නැමැති 51 හැවිරිදි පුද්ගලයෙක්.
මෙම පුද්ගලයා ප්‍රදේශයේ පුද්ගලයින් දෙදෙනෙකු විදේශ ගතකරන බවට පොරොන්දු වී ඔවුන්ගේ රුපියල් ලක්ෂ 08ක මුදලක් වංචාකර සිටි බවට මීට පෙර පොලිසියට පැමිණිල්ලක් ද ලැබී ඇති බවයි වාර්තා වුණේ.
එලෙස මුදල් වංචාවට හසු වූ පුද්ගලයින් දෙදෙනා තවත් පුද්ගලයකු සමඟ පසුගිය 03 වනදා අදාළ පුද්ගලයාගේ නිවසට පැමිණ ඔහුට පහර දී පැහැරගෙන ගොස් තිබෙනවා.
එලෙස පැහැරගෙන ගිය පුද්ගලයාව අඟුරුවාතොට, මෝටාව ප්‍රදේශයේ ලඳු කැලෑවක් ආසන්නයේ දමා ගොස් සිටිය දී පොලිස් හදිසි ඇමතුම් අංකයට ලද තොරතුරක් මත සොයාගත් බවයි පොලිසිය පැවසුවේ.
අනතුරුව ඔහුව ගල්පාත ප්‍රාදේශීය රෝහලට ඇතුළත් කිරීමට පොලිසිය කටයුතු කර ඇති අතර, ඔහුගේ තත්ත්වය බරපතළ බැවින් හොරණ දිස්ත්‍රික් රෝහලට මාරුකර යවා ඇති බවයි වාර්තා වුණේ.
එහිදී මෙම පුද්ගලයා ජීවිතක්ෂයට පත්ව තිබෙනවා.
පහරදීම සිදුකළ පුද්ගලයින් තිදෙනා ප්‍රදේශයෙන් පළා ගොස් ඇති අතර, ඔවුන්ව සොයා විමර්ශන අරඹා ඇති බවයි උසස් පොලිස් නිලධාරියෙක් සඳහන් කළේ.
Sri News Media
