Over thinking නිසා ඔයාගෙ ජීවිතය over කරගන්නවාද? – Sri News

0
8


ඔබ ඔබේ මනසට අයාලේ යන්න දීලා, අගක්, මුලක් සොයා ගන්න නොහැකි ලෙස පැටලිලා හෙම්බත් වෙලද? එකම සිතිවිල්ල තුල සිර වෙලාද? ඔබට ඔබේ සිතිවිලි පාලනය කරන්න බැරි තත්වයට පත්වෙලාද? ඔබේ සියළුම කටයුතු පටලවාගෙන එකම දෙය වෙනුවෙන් සිතිවිලි මලු ගණන් පුරවමින්, හිස් කරමින්, ලතැවෙනවාද? ඔබට ජීවිත අපේක්ෂාව අහිමි වෙලාද? ඔබේ targets වලට යන්න බැරි විදියට ඔබ ඔබටම අගුලු ලා ගෙනද? සතුට ඔබේ ජීවිතයෙන් පලා ගිහින්ද? එහෙමනම් ඔබ over thinking කලාපයේ සිරවෙලා.

එහෙම නම් එන්න. ආදරයෙන් හා සෙනෙහසින් lifie ඔබට ඔබව සොයා දෙන්න, සතුට සොයා දෙන්න, over thinking වලින් මිදෙන්න කියා දෙන්න සූදානම්.

01. Over thinking කෙනෙක් හඳුනා ගන්නේ කොහොමද?

ඔයාගෙ සිත කුළු මීමෙකුට සමාන කරන්න පුලුවන්. සිත කියන්නෙම නිතරම එහෙ මෙහෙ දුවන අපට අතින් අල්ල නවත්වන්න බැරි දෙයක්. සිතිවිලි හැම විටම ඇතිවෙලා නැතිවෙලා යනවා. හුස්මක් අරන් පිට කරන වේගයටත් වඩා වැඩි වේගයකින්. මේ අතර සමහර සිතිවිලි තියෙනව අපේ සිත අල්ලගෙන, ඒකටම අලවගෙන, නැවත නැවත මතකයට ඇවිදින් අපට වද දෙන. අපිව හැඟීම්බර කරවන. අධිකව සංවේදී කරනව. ඔබ ඒ එකම සිතිවිල්ලේ පැය ගණන්, දවස් ගණන්, සති දෙකකටත් වඩා පැටලිලා, එල්ලිලා, එරිලා ඉන්නව නම් ඔබ over thinking කලාපයට ඇතුල් වූ කෙනෙක්.

  • අතීතයේ සිදුවීමක් ගැන, ඔබ පැවසූ දෙයක් ගැන, ඔබේ හැසිරීමක් ගැන ඔබ අනවශ්‍ය විදියට හිතනවා නම් දිගින් දිගටම, ඔබ ඒ ගැන දිගින් දිගටම පසුතැවෙනවා නම් ඔබ over thinking කලාපයට ඇතුල් වූ කෙනෙක්.

 

  • ඔබ කියපු වචනයක්, අල්ලා ගෙන විදවනවාද? ඒ වචනය නිසා අනෙකාගේ සිතිවිලි කුමක් වෙන්න ඇතිද? ඔබ එසේ කතා කරපු එක වැරදිද? හරිද? මේ නිසා සම්බන්ධතාවය අවුල් වෙයිද? නොවෙයිද? ඔබ ඔබවම විවේචනය කරනවාද? ඔබවම වරද සහගත හැඟීමට ලක් කරගන්නවද? සති දෙකකටත් වඩා ඔබට මේ එක සිදුවීමකින් ගැලවෙන්න බැරි විදියට ඔබේ සිතිවිලි ඔබට වද දෙනවා නම් ඔබ over thinking කලාපයට ඇතුල් වූ කෙනෙක්…

 

  • වසර ගණනාවකට කලින් ඔයාට සිද්ධ වෙචිච, ඔයාව ලැජ්ජාවට පත් කරපු, ඔයාව අඬවපු, කලකිරීමට පත් කරපු, තදින් රිදවපු කාරණා ඔයාට අමතක කරන්න බැරිද, ඒවා දිය යට තිබෙන රබර් බෝලයක් වගේ මතු වෙමින් වද දෙමින් ඔයාගේ සිතිවිලි පාලනය කර ගන්නට නොදී වර්තමානයේ ඔයාගෙ සියලු කටයුතු අඩාල කරනවාද? ඔබ over thinking කලාපයට ඇතුල් වූ කෙනෙක්..

 

  • ඔබ අනාගතයේදී කරන්න ඉන්න දෙයක් ගැන, වෙයි කියල හිතන දෙයක් ගැන බියෙන්, සැකෙන් බලමින්, වෙයි කියල හිතන අසුබවාදී දේවල් තුළම භයානක ලෙස සිතිවිලි සමග ගිලෙමින්, කරන්න තියෙන කාරණා නොකෙරෙන තැනට සිතිවිලි සමග දවස් ගණන් හිරවෙලා ඉන්නවනම් ඔබ හිතන්න ඔබ over thinking කලාපයට ඇතුල් වූ කෙනෙක්..

 

  • ඔයා හැමවෙලාවෙම අනික් අයත් තමන් වගේම හිතනව කියල අදහස් කරනව, ඔයා වගේ වැඩ කරනව කියල හිතල එහෙම නොවෙන කොට ඔයා රැවටීමකට ලක්වෙලා, ඒ අය ඔයාව එයාලට ඕනි විදියට පාලනය කරනව කියල ඔයා රෑ දවල් නැතිව ඒ ගැන හිතනව නම්, ඒ සිතිවිලි වලින් මිදෙන්න තියෙන හොඳම නින්ද කියල හිතල අධික නින්දකට යනවනම් ඔයත් Over thinking කලාපයට ඇතුල් වූ කෙනෙක්…

 

  • ඔයා තමන්ගෙ ජීවිතට සිද්ධ වුනු සුලු සුලු පාඩුවීම් වලට, නැතිවීම් වලට ⁣අනවශ්‍ය විදියට කම්පනය වෙලා ඒ ගැන නිතර නිතර සිතමින් තමන්ට ලැබුණු ජීවිතය නැති නාස්ති කර ගන්නා කෙනෙක්ද? ඔබ over thinking කලාපයට ඇතුල් වූ කෙනෙක්..

 

  • ඔයා බැඳීමක ඉන්නව නම් ඔයාව, ඔයාගෙ අවශ්‍යතා, ඔයාගෙ සියළු ඕනෑ එපාකම් ගැන නොහිතා කොටින්ම ඔයාවම නැතිකරගෙන ඒ සම්බන්ධයට 100% ටත් වඩා ඉඩක් දෙන්න යනවා නම් ඔයා Over thinking කලාපයට ඇතුල් වූ කෙනෙක්..

 

02. Over thinker කෙනෙක්⁣ට වෙන හානි

1.ඔබ අනවශ්‍ය විදියට ඔබේ මුලු ජීවිතයම 100% කටත් වඩා වැඩියෙන් සම්බන්ධයකට දෙන්න යෑම නිසා ඔයාගේ වටිනාකම එයාල ඉදිරියේ අඩු වෙනවා. සම්බන්ධතා අවුල් වෙනවා. අහිමිවීම් වලට ලක් වෙනවා.

2.ඔයාගෙ සුවදායී නින්ද ඔයාට නැති වෙනවා.

3.වැඩකට අවධානය දෙන්න බැරි වෙනවා.

4.ඔයා ගැනම පිළිකුලට, ලැජ්ජාවට පත් වීම නිසා සමාජය ඉදිරියට යන්න, අභියෝග බාර ගන්න බය වෙනවා.

5.අධික දුක, කම්මැලිකම, තරහව, සැකය, වගේ negative දේවල් එක්ක ජීවත් වෙන්න වෙනවා. ඔයාගෙ වර්තමාන ජීවිතේ සතුට, සැනසීම නැති වෙනවා.

6.මානසිකව වගේම කායිකවත් ඔබ රෝගී වෙනවා.

7.ජීවිතය පිළිබඳ විඩාවට, කලකිරීමට පත්වීම නිසා සියදිවි නසා ගැනීම දක්වා යන තත්වයට පත් වෙන්න පුලුවන්.

 

03. Over thinking එකෙන් නිදහස් වෙන්නේ කොහොමද?

බෙෘද්ධ දර්ශනය තුල අපේ සිත ගැන බොහොම ගැඹුරින් විග්‍රහ කරනවා.

“සිතිවිලි දෙස බලන්න. බාහිර ලෝකය ගැන නොසිතන්න. ඔබේ සිතිවිලි අල්ලා නොගන්න. ඒවාට යන්න දෙන්න. සිතිවිලි එනවා, යනවා. ඒවා අල්ලා නොගන්න. ඔබ මනසේ වහලෙකු නොවී නිදහස් වීමේ මග එයයි.
දැක්ක නම් දැක්ක ඉවරයි.
බැලුවනම් බැලුවා ඉවරයි
වින්ද නම් වින්ද ඉවරයි. ඒ මොහොතේ ජීවත් වෙන්න.”

ඕෂෝ මෙහෙම කියනවා,

“ඔබ මනසින් මිදිලා සිහියෙන් ඉන්න තැන සත්‍යයේ ආලෝකය, බැබලීම පවතිනවා. ඔබේ සැබෑ ජීවිතය පවතිනවා.”

 

04. ඔයාට පුලුවන් දේ කරන්න, බැරි දේ අත්හරින්න

Over thinking කරන කෙනෙකුගේ තියෙන ලොකුම දුර්වලතාවයකින් එකක් තමයි හැමෝම වෙනුවෙන් ඔවුන්ගේ ඕනෑ එපාකම්, ඉල්ලීම් සියල්ල කරන්න බැරි වීම පිලිබඳ සාංකාවට පත්වීම.

අනෙකෙකුගේ ඉල්ලීම් වලට “බෑ” කියල එක වචනයෙන්, කෙලින්ම කියන්න බය වෙන්න එපා. ඔබට ඉල්ලීම් ඉටු කරන්න බැරි නම් කෙලින්ම කියන්න. ඔබ හිතනවා නම් එහෙම කළොත් ඒ කෙනා ඔබ ගැන මොනවා හරි වැරදියට හිතයි කියල ඒ අදහසේ ඉන්න එක නවත්තන්න. ඔබ හිතනව නම් මම ඉස්සර එහෙම නෑ, මම ⁣එහෙම තෙනෙක් නෙවෙයි කියල ඔබ තේරුම් ගන්න ඕනි මේ ලෝකෙ කිසි කෙනෙක්ට එහෙම හැමෝටම උදව් කරන්න බැරි බව. මේ තත්වය සාමාන්‍ය දෙයක් කියල. ඔබ ඒ මොහොතෙ ඔබට පුලුවන් දේ කරන්න. බැරි දේ අත්තරින්න, අමතක කරන්න. ඔයාගෙ සීමාවට එහා කරන්න බැරි දේවල් තේරුම් අරන්, ඔබේ සීමාව තේරුම් අරන්, ඔබව අපහසුතාවවට පත් කරන දේවල් වලට බෑ කියන්න නොබියව පුරුදු වෙන්න.

ඔබ ඔබේ සිත පුරුදු පුහුණු කිරීම තුලින් ඔබේ මනස අනවශ්‍ය බරින් නිදහස් වෙනවා. ඔබ වටේ ඉන්න අය අසාධාරණ ඉල්ලීම් කරන එක නවත්තනවා. ඔබට සලකන අය, ඔබට ආදරය කරන අය ඔබෙන් අසාධාරණ ඉල්ලීම් ඉල්ලන එක නවත්වනවා.

ඔවුන් ඔබව තේරුම් ගනීවි. ඔබට නිදහසක් ලබා දේවි. ඔවුන් ඔවුන්ගෙන් විය යුතු දේවල් සහ ඔබ වෙනුවෙන් කළයුතු දේවල් තේරුම් ගනීවි. ඔබට නිදහසේ සම්බන්ධතා වල ජීවත් වෙන්න පුලුවන් වේවි.

 

05. ඔබ over thinking මට්ටමට ගෙනයන හේතු හඳුනා ගන්න

සුළුවෙන් ගන්න ඕනි ප්‍රශ්නයක් මහා ලොකුවට හිතට ගන්න එක නවත්වන්න. ඔබ විවේකයක් ගෙන ප්‍රශ්නය දිහා බලන්න. හැම වෙලාවේම ප්‍රශ්න වලට උත්තර තියෙනව කියල දිගින් දිගට හිතන එක නවත්වන්න. මනසට විවේකයක් දෙන්න. ප්‍රශ්න ජීවත් වෙනකොට එනව, යනවා. අපිට විසඳුම් තියෙන අවස්ථාත් තියෙනව. කාලයට ඉඩ දීල අත්හැරල ඉන්න වෙන අවස්ථාත් තියෙනව. ප්‍රශ්න ඇත්තටම ප්‍රශ්නයක් වෙන්නෙ බොහොම කලාතුරකින්. ඔයාගෙ ප්‍රශ්න වලින් බොහොමයක්ම ඔයා ඔයාගෙ ඔලුවෙන් හදාගත්තු දේවල්.

උදාහරණයක් විදියට,
මගේ පෙම්වතියට මාව එපා වෙලාද? එයා ඉස්සර වගේ නෙමෙයි නේද? එයා දැන් මම ගැන හිතන් නෑ නේද? එයා ඇයි එහෙම කිව්වෙ? එයා ඇයි එහෙම හැසිරුනේ වගේ වැඩකට නැති තැන් වලට යන එක නවත්තන්න.

ඒ නිසා ප්‍රශ්න දෙස විවේකීව බලලා ප්‍රශ්න ඇත්තටම ප්‍රශ්නය කියන එක නැවත වරක් සිතල ප්‍රශ්න අල්ලගන්න එක නවත්වන්න පුරුදු වෙන්න.

 

06. වර්තමානයේ ජීවත් වෙන්න

ඔයාට වගකීමක් පවරන විට බෑ කියල හිතෙන සිතුවිල්ලට පයින් ගහන්න පුරුදු වෙන්න. ඔයාට බෑ කියන සිතිවිලි මග අරින්න උත්සහ කරන්න. ඔබ සාර්ථකව නිමකල දෙයක් ගැන හිතන්න මනස පුරුදු කරන්න. වර්තමානයට එන්න. වර්තමානයේ, මේ මොහොතේ සිත තබාගෙන වැඩ කරන්න. මේ මොහොතෙ තිබෙන තත්වය යටතේ ජීවත් වෙන්න. අතීත සිදුවීම් සිහිනයක් වගේ. ඔබ රාත්‍රියට දකින හීන හීනයක් කියල ඔබ දන්නව. ඔබ ඒවාට බය වෙන් නෑ. අතීත සිද්ධියත් සිහිනයක් වගේ. ඒවාට බිය විය යුතු නෑ. අගයක් දිය යුතු නෑ. ඒ වගේම තමයි ඇත්තටම ආපු නැති අනාගතයක් ගැන හිතන එක නවත්වන්න. ඔයා කොටියෙක් චිත්‍රයට ඇන්දට හැබැයින් බය වෙන් නෑ වගේ අනාගතය පිළිබඳ සිතමින් ලතැවෙන එක නවත්වන්න. මේ,මොහොතේ කරන වැඩෙත් එක්ක, පවතින යථාර්ථයත් එක්ක ජීවත් වෙන්න.

 

07. සාම්පුදායික ලෙස සිතන එක නවත්වන්න

අපි ඉපදුන දිනයේ සිටම නොයෙකුත් දේවල් මනසට වැටෙනව. කොටින්ම අපි හැම දෙයක්ම කොටස් දෙකකට බෙදල බලන්න පුරුදු වෙලා ඉන්නව. හොඳ / නරක / කළු / සුදු / අඳුර / ආලෝකය / යහපත් / අයහපත් දේවල් දිහා මේ විදියට බලන්න පුරුදු වුනොත් අපට හැමදාම බෙද බෙදා, ලතැවි ලතැවි, තීරණයක් ගන්න බැරිව ගිහින් over thinking මට්ටමට යනකම්ම දෙපැත්තට දෝලනව වෙවී ඉන්න සිදු වෙනව. කලු/සුදු වගේම අලු පාටත් ලෝකයේ පවතින බව තේරුම් ගන්න. නිරාගමික වෙන්න. නිර්පාක්ෂික වෙන්න. අතීතයේ මිනිසුන් කළ පලියට අපිත් කල යුතුයි කියන මතයේ ඉන්න එක නවත්තන්න. ඔබට කළ හැකි හොඳම දෙය කරන්න. සාම්පුදායික නීති වලට හිරවෙන එක නවත්වන්න.

 

08. ජීවිතය රේඛීය නොවේ

ඔයා හිතන දේ, ඔයාගෙ පිළිවෙලටම වෙන්නෙ නෑ. ජීවිතේ සරල රේඛාවක් වගේ මටසිලිටු නෑ. හැල හැප්පීම්, ගත්තු තීරණ අකුල ගන්න වෙන අවස්ථාත් එනවා. පසුබසින්න වෙන මෙහෛාතවල් එනවා. ඒ නිසා ඕනිම වෙනස් කිරීමකට, වෙනස් වීමකට, සුළඟට ඔරොත්තු දෙන ගොයම් ගසක් වගේ නොබියව මුහුණ දෙන්න. වෙනස් වීම ජීවිතයේ ස්වභාවය කියන එක අවබෝධ කර ගන්න. සියල්ල plan කරන විදියටම සිදුනොවීම ලෝක ස්වභාවය බව වටහා ගන්න. ජීවිතය එකම රිද්මයක් ගන්නේ නෑ කියන එක තේරුම් ගන්න. ගලා යන ගඟක් වගේ වෙන්න.

අවසානයට ඔයාට කියන්න තියෙන්නෙ “ඕනවට වඩා ඕනිම දෙයක් ඕනිම නෑ” කියන වචනයයි.

මේ ලෝකය සුන්දරයි, සිතුවිලි වලට යන්න දෙන්න. ඒවා අත්හරින්න. වර්තමානය තුල ඉන්න. මේ වර්ණවත් ලෝකය විඳින්න. ඔබේ මනස ජය ගන්න. ඔබ ඔබම වන්න, ඔබට ආදරය කරන්න, ඔබව රැක බලා ගන්න. සතුටින් ඉන්න.





Sri News

LEAVE A REPLY

Please enter your comment!
Please enter your name here