ඉන්දීය අග්‍රාමාත්‍ය නරේන්ද්‍ර මෝදි මහතා සිය X ගිණුමෙහි විශේෂ සටහනක් තබා ඇත.
ඒ, පාලි භාෂාව සම්භාව්‍ය භාෂාවක් ලෙස නම් කිරීමට ඉන්දීය රජය ගත් තීරණය, බුදුන් වහන්සේගේ චින්තනය විශ්වාස කරන්නන්ගේ ප්‍රීතියට හේතු වී තිබීම සතුටක් බවයි.
ඉන්දීය අග්‍රාමාත්‍ය නරේන්ද්‍ර මෝදි මහතා, පාලි භාෂාව සම්භාව්‍ය භාෂාවක් ලෙස නම් කිරීම නිමිත්තෙන් සංවිධානය කරන ලද වැඩසටහන හා සම්බන්ධ වෙමින් මේ බව පවසා ඇත.
කොළඹ පැවති මෙම වැඩසටහන සඳහා විවිධ රටවලින් සහභාගී වූ විද්වතුන්ට සහ භික්ෂූන් වහන්සේලාට ද සිය කෘතවේදීත්වය පළකර තිබෙන බව වාර්තා වේ.
ඉන්දියානු මහ කොමසාරිස් කාර්යාලයේ සංස්කෘතික අංශය වන ස්වාමි විවේකානන්ද සංස්කෘතික මධ්‍යස්ථානය විසින් “සම්භාව්‍ය භාෂාවක් ලෙස පාලි” යන මැයෙන් සංවිධානය කරන ලද විද්වත් සාකච්ඡාව එම මධ්‍යස්ථානයේදී පවත්වා ඇත.
නියෝජ්‍ය ඉන්දීය මහ කොමසාරිස් ආචාර්ය සත්‍යාංජල් පාණ්ඩේ මහතා මේ සඳහා සහභාගී වූ අතර බුද්ධ ශාසන ආගමික සහ සංස්කෘතික කටයුතු, ජාතික ඒකාබද්ධතා, සමාජ ආරක්ෂණ සහ ජන මාධ්‍ය අමාත්‍යාංශයේ ලේකම් රංජිත් ආරියරත්න මහතා ප්‍රධාන ආරාධිත අමුත්තා ලෙස සහභාගී වී තිබෙන බව පැවසේ.
Sri News Media
