ලබන 03 වනදා සිට 06 වනදා දක්වා පාර්ලිමේන්තුව රැස්වීමට නියමිත අතර, පක්ෂ නායක රැස්වීමේදී තීරණය කර තිබෙන්නේ ආණ්ඩුවේ ප්‍රතිපත්ති ප්‍රකාශය පිළිබඳ විවාදය ලබන 03 සහ 04 යන දිනවල පැවැත්වීමටයි.
දෙසැම්බර් 05 වනදා අතුරු සම්මත ගිණුමට අදාළ යෝජනා සම්මතය පාර්ලිමේන්තුවට ඉදිරිපත් කිරීමට නියමිතව තිබෙන අතර, කතානායක ආචාර්ය අසෝක රන්වල මහතාගේ ප්‍රධානත්වයෙන් පක්ෂ නායක රැස්වීම පසුගියදා පැවත්වුණි.
ජනාධිපතිවරයා පසුගියදා පාර්ලිමේන්තුවට ඉදිරිපත් කළ ආණ්ඩුවේ ප්‍රතිපත්ති ප්‍රකාශයට අදාළ යෝජනාව ලබන 03 වනදා ඉදිරිපත් කිරීමට එහිදී තීරණය කෙරුණු අතර, එදින පෙරුවරු 09.30 සිට 05.30 දක්වා ඒ පිළිබඳ විවාදය පැවැත්වෙනු ඇත.
දෙසැම්බර් 04 වනදා පෙරවරු 09.30 සිට පස්වරු 05 දක්වා තවදුරටත් විවාදය පවත්වා ඡන්දය විමසීම පැවැත්වීමට ද පක්ෂ නායක එකඟතාව පල වූ අතර, අතුරු සම්මත ගිණුමට අදාළ යෝජනා පිළිබඳ විවාදය දෙසැම්බර් 05 සහ 06 යන දෙදින පෙරවරු 09.30 සිට පස්වරු 05.30 දක්වා පැවැත්වීමටත් තීරණය කර තිබෙන බව සඳහන් වේ.
Sri News Media
