රුපියල් කෝටි තුනහමාරක් පමණ වටිනා ලෑන්ඩ් කෲසර් වර්ගයේ සුඛෝපභෝගී ජීප් රථයක් තංගල්ල පොලිස් වසමේ විතාරන්දෙනිය ප්‍රදේශයේ නිවසක සඟවා තිබියදී පොලිස් භාරයට ගෙන තිබේ.
නීතිවිරෝධී ලෙස එකළස් කරන ලද වාහනයක් අදාළ නිවසේ සඟවා ඇතැයි පොලීසියට ලැබුණු තොරතුරක් මත ඊයේ (12) පස්වරුවේ මෙම වැටළීම සිදුකර ඇති අතර එම ජීප් රථයේ අනන්‍යතාවය තහවුරු කිරීම සඳහා අවශ්‍ය ලේඛන කිසිවක් ඔවුන් සන්තකයේ තිබී නැත.
මෙම ජීප් රථයේ අයිතිකරු ලෙස සැලකෙන ඇඹිලිපිටිය, පල්ලේගම ප්‍රදේශයේ ව්‍යාපාරිකයකු නීතීඥයකු මාර්ගයෙන් මාතර පොලීසියට බාරවී ඇති අතර ඔහුව අත් අඩංගුවට ගෙන ඇත.
මෙම ජීප් රථය සම්බන්ධයෙන් රසපරීක්ෂක වාර්තාවක් ලබාගැනීමට නියමිත අතර මෙහි වත්මන් හිමිකරු මෙය මිලදීගෙන ඇත්තේ මහනුවර ප්‍රදේශයේ වාහන අලෙවි ස්ථානයකින් බවත් සඳහන්. එම වාහන අලෙවි ස්ථානයට කළුතර ප්‍රදේශයේ ප්‍රකට දේශපාලනඥයෙකුගේ ඥාති සම්බන්ධතාවක් ද ඇති බවක් කියැවේ.
Sri News Media
