දුම්රිය ස්ථානාධිපතිවරුන් විසින් ඊයේ (ඔක්තෝබර් 30) පස්වරුවේ දියත් කළ වෘත්තීය ක්‍රියාමාර්ගය ඊයේ මධ්‍යම රාත්‍රියේ සිට අවසන් කළ බව දුම්රිය ස්ථානාධිපතිවරුන්ගේ සංගමයේ ප්‍රධාන ලේකම් සංජය ජයසුන්දර පැවසීය.
උසස්වීම්, බඳවාගැනීම්, දුම්රිය අවලංගු වීම් සහ දුම්රිය දෙපාර්තමේන්තුවේ යටිතල පහසුකම් ප්‍රමාණවත් නොවීම ආදී ගැටලු කිහිපයක් මුල්කරගනිමින් දුම්රිය ස්ථානාධිපතිවරුන්ගේ සංගමය වෘත්තිය ක්‍රියාමාර්ගයක නිරත වන බවට පසුගිය සඳුදා තීරණය කර තිබුණු අතර ඉල්ලීම් සඳහා ප්‍රතිචාර දැක්වීමට ඔවුන් දුම්රිය බලධාරීන්ට පැය 72ක කාලයක් ලබාදී තිබිණි.
එහෙත් ප්‍රවාහන අමාත්‍යවරයාගේ සම්බන්ධීකරණ ලේකම්වරයා හා දුම්රිය සාමාන්‍යාධිකාරිවරයා සමග පැවති සාකච්ඡා අසාර්ථක වීමෙන් අනතුරුව දුම්රිය ස්ථානාධිපති සංගමයේ විධායක සංගමයේ තීරණය පරිදි ඊයේ පස්වරු 4:30 සිට ප්‍රවේශපත්‍ර නිකුත් කිරීමෙන් වැළකෙමින් වෘත්තිය ක්‍රියාමාර්ගයක් ආරම්භ කෙරුණු අතර එය පැය 7කට අධික කාලයක් තිස්සේ ක්‍රියාත්මක විය.
කෙසේවෙතත් අදට (ඔක්තෝබර් 31) යෙදී ඇති දීපාවලී දිනයේදී ජනතාව අපහසුතාවට ලක්වීම වැළැක්වීමේ පියවරක් ලෙස මෙම වෘත්තීය සමිති ක්‍රියාමාර්ගය ඊයේ මධ්‍යම රාත්‍රියෙන් අවසන් කිරීමට තීරණය කළ බවයි දුම්රිය ස්ථානාධිපතිවරුන්ගේ සංගමයේ ප්‍රධාන ලේකම් සංජය ජයසුන්දර ප්‍රකාශ කළේ.
Sri News Media
