9-7. බිළාලපාදක සිටුවරයාගේ කථා වස්තුව – Sri News

0
8

“පුංචි පිනක් වුණත් අත්හරින්න එපා…!”

පින්වතුනේ, පින්වත් දරුවනේ, දිනක් සැවැත් නුවර දෙව්රම් වෙහෙරෙහි වැඩසිටි බුදුරජාණන් වහන්සේ භුක්තානුමෝදනා ධර්ම දේශනාවකදී මෙහෙම වදාළා.

“පින්වත් උපාසකවරුනි, ලෝකයෙහි සමහර උදවිය ඉන්නවා. එයාලා විතරයි දන් දෙන්නේ. පිටස්තර උදවිය සහභාගී කරවා ගන්නේ නැහැ. ඒ හේතුව නිසා ඒ උදවිය උපනූපන් ආත්මවල භෝග සම්පත් ලබනවා. නමුත් පිරිවර සම්පත් ලබන්නේ නැහැ.

තව සමහරු ඉන්නවා. එයාල දන් දෙන්නෙ නැහැ. නමුත් අනිත් අයව දන්දීම සඳහා පොළඹවනවා. ඒ අය උපනූපන් ආත්මවලදී පිරිවර සම්පත් ලබනවා. භෝග සම්පත් ලබන්නේ නැහැ.

තව සමහරු ඉන්නවා. තමන් දන්දෙන්නෙත් නැහැ. අනිත් අයට දෙන්න දෙන්නෙත් නැහැ. එතකොට උපනූපන් ආත්මවලදී භෝග සම්පතුත් නැහැ. පරිවාර සම්පතුත් නැහැ.

තවත් උදවිය ඉන්නවා. තමාත් දන්දෙනවා. අන් උදවියත් සහභාගී කරගන්නවා. ඒ අය උපනූපන් ආත්මවලදී භෝග සම්පත් ලබනවා. පරිවාර සම්පතුත් ලබනවා.”

ඉතින් බුදුරජාණන් වහන්සේ වදාළ මේ දේශනාව නුවණැති පුද්ගලයෙකුට අහන්නට ලැබුණා. ඔහු මෙහෙම හිතුවා. ‘අප්පේ….! හරී අසිරිමත් නෙව. මේ කාරණය මං කලින් දැනසිටියේ නැහැ. එතකොට භෝග සම්පත් පිණිසත්, පරිවාර සම්පත් පිණිසත් දන් දිය යුත්තේ ඔය විදිහටයි. මාත් එවැනි දානයක් පූජා කරගන්නට ඕන.’

මේ පුද්ගලයා බුදුරජාණන් වහන්සේ ළඟට ගිහින් දානයට ඇරයුම් කළා.

“ස්වාමීනී, භාග්‍යවතුන් වහන්ස, අපගේ දානය පිළි ගන්නා සේක්වා!”

“පින්වත, කී නමකට දානය සූදානම් කරන්න පුළුවන්ද?”

“ස්වාමීනී, භාග්‍යවතුන් වහන්සේ ප්‍රධාන සියලු භික්ෂූන් වහන්සේලාට මං දානය දෙන්න කැමතියි.”

භාග්‍යවතුන් වහන්සේ එම ඇරයුම පිළිගත්තා. එතකොට මේ තරුණයා හනික ගමට දිව්වා. ගෙයක් ගානෙ ගියා.

“අම්මේ… තාත්තේ…. අයියේ…. අක්කේ… මං හෙට බුදුරජාණන් වහන්සේ ප්‍රමුඛ භික්ෂුසංඝයාට දානයට ඇරයුම් කළා. පුළුපුළුවන් විදිහට මට උදව් කරන්න. හාල් පොල් එළවළු ආදිය මට සකසා දෙන්න. අපි එක තැනක දානය හදලා පිළිගන්වමු.” මෙහෙම කිය කිය ඇවිදගෙන ගියා.

ඉතින් මේ තරුණයා එක්තරා සිටුවරයෙකුගේ වෙළඳසැළකට ඇතුළු වුණා. මේ කාරණය කිව්වා. සිටුවරයා කල්පනා කළා, ‘හනේ… යසයි! මේකා තමුන්නේ තරමට එපායැ භික්ෂූන් වහන්සේලා වඩම්මාගන්න. මුළු ගමම හවුල්කරගන්න නෙව වටේ දුවන්නේ…’ කියලා.

මෙහෙම හිතලා මේ සිටුවරයා ඇඟිලි තුන එකතු කොට ස්වල්පය බැගින් මුං ඇට දුන්නා. මෑ ටිකකුත් දුන්නා. ඉතින් මේ තරුණයා ඉතාම ගෞරවයෙන් එය අරගෙන ගියා. සිටුවරයා ‘හක හක’ ගාලා හිනහවෙන්න පටන්ගත්තා. වෙළඳසැළට ආපු මිනිස්සුන්ට තමන්ගේ ඇඟිලි තුන පෙන්නුවා.

“හික්… හික්… මේ බලාපන්…. මේ ඇඟිලි තුන එක්කාසු කළ විට බළලාගේ කකුල වගේ. මෙන්න මේ වගේ මම අරකාට චූට්ට චූට්ට දුන්නේ…. ගිතෙල් මී පැණි වුණත් මං ඕකාට දුන්නේ මේ හැන්දේ යාන්තං තැවරෙන චුට්ට විතරයි. හික්.. හික්… හික්…”

එදා සිට මේ සිටුවරයාට නම වැටුණා ‘බිළාලපාදක සෙට්ඨි’ කියලා. බළල් කකුලේ සිටුතුමා යනු ඒ නමේ තේරුමයි. මේ සිටුවරයා හරී ආඩම්බරකාරයි. ඒ නිසා සේවකයෙකු ඇමතුවා.

“ඒයි! මෙහෙ වරෙන්… ගිහින් බලාපන් අරකා මං දීපු දේවල්වලට මොකක් කරනවාද කියා….”

ඉතින් ඒ පුද්ගලයා ඔහුගේ පස්සෙන් ගියා. අර තරුණයා කිසි කලබලයක් නැතුව ඒවා අරන් ගිහින් වෙන වෙනම තිබ්බා. දානය පිළියෙල කරද්දි ‘සිටුවරයා දුන් මේ මුං ඇට, මෑ ඇට, තෙල් ආදියෙන් මහත්ඵල ලැබේවා’ කියා දානයට එක්කළා. එතකොට මේ කාරණය සිටුවරයාට අහන්න ලැබුණා.

Sri News Media

LEAVE A REPLY

Please enter your comment!
Please enter your name here