වට්ස්ඇප් ඇතුලු සමාජ මාධ්‍ය ජාලා ඔස්සේ සිදුකරන සන්නිවේදන උපක්‍රම හරහා ජනතාව වංචාවන්ට ගොදුරු කර ගැනීමේ සිදුවීම් වාර්තා වන බවට නිරීක්ෂණය වී තිබෙන අතර වට්ස්ඇප් ගිණුම් හිමියන්ගේ ගිණුම් හැක් කිරීම මගින් ඔවුන්ගේ සබඳතා ලැයිස්තුවට අයත් සෙසු පුද්ගලයින් වෙත පණිවුඩ යොමුකර මුදල් ආධාර ඉල්ලීම සිදුවෙන බවටයි සොයා ගෙන ඇත්තේ.
අදාළ පුද්ගලයන්ගේ දුරකතනයට ලැබී ඇති යම් කේතයක්, රහස් අංකයක් හෝ මුරපදයක් තමා වෙත ලබාදෙන මෙන් කරන ඉල්ලීම් මගින් අපරාධකරුවන් සිය මූල්‍ය වංචාවන් සඳහා අවශ්‍ය තාක්ෂණික ප්‍රවේශය ලබා ගන්නා බව ශ්‍රී ලංකා පරිගණක හදිසි ප්‍රතිචාර සංසදය පවසයි.
තම සමාජ මාධ්‍ය ගිණුම් අන් අයගේ ග්‍රහණයට ලක්වීම වළක්වා ගැනිම සඳහා දුරකතනයට හෝ සමාජ මාධ්‍ය ජාලා ගිණුමට ලැබී ඇති යම් කේතයක්,රහස් අංකයක් හෝ මුරපදයක් බාහිර පාර්ශව වෙත යොමු කිරීමට පෙර එම පාර්ශවයේ අනන්‍යතාව තහවුරු කර ගැනීමට කටයුතු කිරීම වැදගත් වන අතර යම් ආකාරයකින් සයිබර් මූල්‍ය වංචාවකට මුහුණදීමට සිදුවුවහොත් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාශය වෙත පැමිණිලි යොමුකළ හැකියි.
Sri News Media
