කථානායක අශෝක සපුමල් රන්වල මහතාගේ උපාධි සුදුසුකම් සම්බන්ධයෙන් මතුව ඇති ප්‍රශ්නය පිළිබඳව ඔහු ඉදිරියේදී කරුණු පැහැදිලි කිරීමක් සිදුකරනු ඇති බව ආණ්ඩු පක්ෂයේ ප්‍රධාන සංවිධායක, සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා පවසයි.
“මං හිතන්නෙ කථානායකවරයා ඒ ගැන පැහැදිලි කිරීමක් කරාවි. අපි ඒක ඒ ප්‍රශ්නය ලොකූවට, දණිහෙන් උඩට අරගෙන නෑ. මොකද අපි දන්නවා ඔහු උසස් අධ්‍යාපනය ලබාගත්තේ කොහෙද කියන එක. ඒක කාටවත් රහසක් නෙවෙයි. ඔහුත් එක්ක ඒ ආයතනයේ ඉගෙන ගත්ත අය දන්නවා. ඒ වගේම ඔහු වැඩකරපු ආයතනයෙනුත් ඔහුට ඒ උසස් අධ්‍යාපනයට අවශ්‍ය කරන අවස්ථා හිමිවෙලා තියෙනවා. ඒකත් එක්ක තමයි ඔහු යම් පර්යේෂණ කටයුත්තක් සඳහා ජපානයේ ඒ කටයුතුවල නිරත වෙන්නෙ. මං හිතන්නෙ අවුරුදු 07ක් වගේ ඔහු ඒ කටයුතුවල නිරත වෙලා තියෙනවා. ඉතින් ඒ ගැන ඔහුට ඉතාම හොඳට පැහැදිලි කරන්න පුළුවන්”
ප්‍රශ්නය – වහාම පැහැදිලි කිරීමක් කළ යුතුයි කියලා ඔබ විශ්වාස කරන්නෙ නැද්ද ඒ ගැන ?
“අවශ්‍ය අවස්ථාවේදී ඒක කරන්නම් …”
ප්‍රශ්නය – මෙතැන තියන අනිත් ප්‍රශ්නය අමාත්‍යතුමනි, පාර්ලිමේන්තු වෙබ් අඩවියේ ඔහුගේ නම සඳහන් වෙන ආකාරය බැලුවාම දින හතකට පෙර අපි බලද්දී ඒකෙ තියෙනවා ඩොක්ටර් අශෝක සපුමල් රන්වල කියලා. හැබැයි අද ගිහිල්ලා බලන කෙනෙකුට ඒ ඩොකටර් කියන කෑල්ල පාර්ලිමේන්තු වෙබ් අඩවියෙන් අයින් වෙලා. ඒක එතුමාගේ අනුදැනුම මත වෙච්ච දෙයක්ද, නැත්නම් කාර්ය මණ්ඩලයේ මැදිහත් වීමෙන් වෙච්ච දෙයක්ද, මේ ගැන දැනුවත්භාවයක් තියෙනවද ?
“නෑ, මම මේ වැඩසටහනට සම්බන්ධ වෙනකොට ඒ ගැන දැනුවත්භාවයක නැහැ. කොහොම වුණත් මම හිතනවා ඔහු මේ ඔහුගේ අධ්‍යාපන සුදුසුකම් සම්බන්ධයෙන් කතා කරන්න පටන් ගත්තේ පාර්ලිමේන්තුවට ආවාට පස්සෙ නොවෙයි. ඊට කලින් ඔහු ඒවා කියලා තියෙනවා. ඒ මත පිහිටලා ඔහුට ඒකට පැහැදිලි උත්තරයක් දෙන්න පුළුවන්කම තියෙනවා. මං දන්නෑ මේ දවස්වල සමාජ මාධ්‍යවල අපි කාගෙ කාගෙත් උපාධි සම්බන්ධයෙන් නිකම් සැකසංකා මතු කරන්න පටන් අරන් තියෙනවා. කමකුත් නෑ ඉතින් මොකුත් නැතිකොට ඕවා හරි යන එක කමක් නෑ ඉතින් ….”
Sri News Media
