ජාතික ජන බලවේගයේ නායක, ජනාධිපති අනුර කුමාර දිසානායක මහතා ඇතුළු පිරිස් පාර්ලිමේන්තුව හොර ගුහාවක් යැයි පැවසුවත් දූෂණ විරෝධී පනත, මැතිවරණ වියදම් නියාමන පනත වැනි හොරු අල්ලන නීති සම්මත කළේ පසුගිය පාර්ලිමේන්තුවෙන් බවත් මැතිවරණ වියදම් පනත පාර්ලිමේන්තුවට ඉදිරිපත් කළ අවස්ථාවේදී මාලිමාවේ මන්ත්‍රීවරුන් එම පනතට විරුද්ධව ඡන්දය ප්‍රකාශ කළ බවත් හිටපු ජනාධිපති, එක්සත් ජාතික පක්ෂ නායක රනිල් වික්‍රමසිංහ මහතා පවසයි.
“මේ අය දැන් කියනවා පාර්ලිමේන්තුව හොර ගුහාවක් කියලා. ඔවුන්ගේ මහමැතිවරණයේ තේමාව පාර්ලිමේන්තුව සුද්ද කරමු කියන එක. එහෙනම් මොකක්ද IMF එක ගැන කරන්නෙ ? ඒකනෙ ප්‍රධාන කාර්යය. පාර්ලිමේන්තුව හොර ගුහාවක් කියන්නෙ ජනාධිපති විතරයි. ඒත් ජනාධිපතිතුමා මතක තියාගන්න ඕනෙ මේ පාර්ලිමේන්තුව තමයි මම ජනාධිපති කාලෙදී දූෂණ විරෝධී පනත සම්මත කළේ. මැතිවරණ වියදම් නියාමනය කිරීමේ පනත පාර්ලිමේන්තුවට ඉදිරිපත් කළත් ඒක සම්මත කරන අවස්ථාවේදී මාලිමාව ඊට විරුද්ධව ඡන්දය දුන්නා කියලාත් මම මතක් කරන්න කැමතියි. එහෙනම් අද කොහොමද හොර ගුහාවක් කියන්නෙ ? හොරු අල්ලන එකට විරුද්ධ වුණේ ඔබතුමන්ලා. එහෙනම් ඔබලාත් මේ හොරු රංචුවේ කොටසක්”
රනිල් වික්‍රමසිංහ මහතා මේ බව පැවසුවේ ඊයේ (නොවැම්බර් 09) පැවති නව ප්‍රජාතන්ත්‍රවාදී පෙරමුණේ අපේක්ෂකයින්ගේ හමුවක් අමතමිනි.
Sri News Media
