පානදුර නගරයේ ජනප්‍රිය මාවතේ එක පෙළට පිහිටා තිබූ පැරණි දෙමහල් ගොඩනැගිලි පහක් ඊයේ (ඔක්තෝබර් 30) පස්වරුවේ එකවරම කඩා වැටී තිබේ.
අදාළ ගොඩනැගිලි පහේ දන්ත ශල්‍යාගාරයක්, රෙදිපිළි අලෙවිසැලක් සහ තවත් වෙළඳසැල් කිහිපයක්ම තිබී ඇති අතර අනතුර සිදුවන අවස්ථාවේදී ඒවායින් දෙකක් විවෘතව තිබී ඇත.
අනතුරින් වෙළඳසැල් සම්පූර්ණයෙන්ම විනාශ වී ඇති නමුත් කිසිවකුටත් තුවාල සිදුවී නොමැති බව සඳහන්.
එම ගොඩනැගිලි අසල මාර්ගයේ කාණු පද්ධතිය සකස් කිරීම සඳහා ඊයේ දහවල් සිට බැකෝ යන්ත්‍රයක් යොදාගනිමින් කාණු හාරා ඇති අතර එම බැකෝ යන්ත්‍රයත් පස් පිරවූ ලොරියත් පිටව යාමත් සමගම මෙම ගොඩනැගිලි එකවරම කඩා වැටී ඇත.
බැකෝ යන්ත්‍රයෙන් කාණු සකස් කිරීමේදී පොළවේ ඇතිවූ දෙදරීම නිසා මෙම අනතුර සිදුවන්නට ඇති බවයි එම අවස්ථාවේ එහි සිටි ප්‍රදේශවාසීන් පවසන්නේ.
Sri News Media
