සිංහල සමාජයේ ආදරය දිනාගත් දමිළ ජාතිකයෝ – Sri News

0
5

අපි වසර තිස් ගණනක සිවිල් යුද්ධයකට මුහුණ දුන්න රටක්. ඒ වගේම පසුගිය ජනාධිපතිවරණයේදී දේශපාලන වශයෙන් සිංහල ජාතියට සහ දෙමළ ජනවර්ගයට එකිනෙකට වෙනස් වූ දේශපාලන නැඹුරුතා තියෙනවා කියලත් ඔප්පු වුණා. මේ නිසා අපි අද හිතුවා සිංහල සමාජයේ ගෞරවාදරයට පත් වුණු දමිළ ජාතිකයන් කිහිප දෙනෙක් ගැන ඔබේ මතකය අවදි කරන්න.

 

අපේ රටේ මුලින්ම ජාත්‍යන්තරය තුළ බුද්ධිමතෙක් විදිහට ගෞරවාදරයට පත් වුණු පුද්ගලයා වෙන්නේ ආනන්ද කුමාරස්වාමි මහතායි. ඉහළ දෙමළ සමාජයේ පවුලක උපන් එතුමාගේ මව බ්‍රිතාන්‍ය ජාතික කාන්තාවක්. භූගර්භ විද්‍යාව පිළිබඳව විශේෂඥයෙකු වූ එතුමා අමරණීයත්වයට පත් වුණේ ඒ සම්බන්ධ කළ සොයා ගැනීම් නිසා නම් නෙමෙයි. ලංකාවේ පමණක් නොව මුළු මහත් ආසියාවේම කලාව පිළිබඳව විශේෂඥයෙක් බවට එතුමා පත් වුණා. පොත්පත් සිය ගණනක් රචනා කර ඇති එතුමාගේ කෘති අතරින් “මධ්‍ය කාලීන සිංහල කලා” කෘතිය අදටත් සැලකෙන්නේ එතුමාගේ පමණක් නොව එකී ක්ෂේත්‍රයට සම්බන්ධ විශිෂ්ටතම කෘතියක් විදියට.

 

මහාලිංගම් මහාචාර්යතුමන් පේරාදෙණිය සරසවියේ ඉංජිනේරු පීඨය බබළවපු විද්‍යාර්ථියෙක්.ඉතාමත් චාම් ජීවිතයක් ගත කළත් විෂය දැනුම අතින් එතුමා දකුණු ආසියාවේම ප්‍රාමාණිකයෙකුව සිටියා. මේ නිසාම එතුමා ජීවතුන් අතර සිටියදීම ජීවමාන පුරාවෘත්තයක් බවට පත් වුණා. එතුමා සම්බන්ධ එක කතාවක කියවෙන විදිහට ඇව්රෝ ගුවන් යානා සමාගමේ ජෙට් එන්ජිමක ඇති වුණ ගැටලුවක් එතුමා විසින් නිරාකරණය කරලා තියෙනවා. මෙයින් පුදුමයට පත් වුණු එම සමාගමේ නිලධාරීන් එතුමාට අවශ්‍ය වන්නේ කුමක්ද කියලා විමසලා තියනවා. රන්මසු පොදි ලබාගැනීමට හැකියාව තිබුණත් එතුමා ඉල්ලලා තියෙන්නේ පේරාදෙණියේ සිසුන්ට උගන්නන්න ජෙට් යානා එන්ජිමක් විතරයි. (සමහරුන්ට අනුව මේ කතාව වෙනස් විදිහකට කියවෙනවා)

 

අපි පොඩි කාලේ ශනිදා ආයුබෝවන් වැඩසටහන නරඹද්දී හිසේ මල් ගවසාගෙන සුන්දර සිනාවකින් වනක්කම් කියපු කාන්තාවක් හිටියා. ඇය තමයි කමලනී සෙල්වරාජන්. ලොතරැයි වැඩසටහන්වල පවා දමිළ බසින් නිවේදනය කිරීම සිදු කළේ ඇයයි. මේ වැඩසටහන් නිසා ඇයව සිංහල නිවේදකයන් හා සමාන සමීපත්වයකින් සිංහල ජනතාවට දැනුනා. වසර තිහකට අධික කාලයක් ජාතික රූපවාහිනියේ සේවය කරපු ​ඇයව හදිස්සියේ සේවයෙන් නෙරපා හැරීමත් සමඟ ඩිමෙන්ෂියා රෝගයට ගොදුරු වුණු ඇය නිහඬව ම අපෙන් සදහටම සමු ගත්තා.

 

“රන් ටිකිරි සිනා, නිම් හිම් සෙව්වා මා සසරේ” ලංකාවෙ අතිශයින්ම ජනප්‍රිය ගීත කියන එක ගැන විවාදයක් නෑ. මේ ගීත් මුලින්ම ඉංග්‍රීසි බසින් රචනා කරලා තියෙන්නෙ නිමල් මෙන්ඩිස් මහතා විසින්. මේක ගී​ත නිමල් මෙන්ඩිස් ගේ සිතුවිලි අනුව සිංහල භාෂාවට නගලා තියෙන්නේ දෙමළ ජාතිකයෙක් කියලා කිව්වොත් ඔබ විශ්වාස කරනවද? මේ පෙළහර පෑමට සමත් වුණු පුද්ගලයා තමයි ඔගස්ටස් විනයාගරත්නම් මහත්මයා. වෘත්තියෙන් භාෂා පරිවර්තකයෙකු වුණු එතුමා සිංහල සිනමා පට ගණනාවකට පද වැල්වලින්  තමන්ගේ දායකත්වය ලබලා දුන්නා.

 

Sri News Media

LEAVE A REPLY

Please enter your comment!
Please enter your name here