සල්ලි දීලා සතුට ගන්න පුළුවන් විදි මේවා තමයි! – Sri News

0
3

ඇත්තටම සල්ලි වලට සතුට ලබාගන්න බැරිද? මේක සෑහෙන්න වාදවිවාද වලටත් විෂය වුණු සංකීර්ණ කාරණාවක්. හැබැයි එහෙම වුණාට අපිට ගොඩක් වෙලාවට දකින්න ලැබෙනවා, “සතුට කියන දේ සල්ලි වලට ගන්න බෑ” කියලා සෑහෙන්න දෙනෙක් වැළලෙන්න හදනවා. හැබැයි ඉතින් ගොඩක් දෙනෙක් මේක අර කීමට කියන කතන්දරයක් මිසක්, එහෙමට හිතලා බලලා කියන දෙයක් නෙවෙයි. සමහර වෙලාවට අපිට සතුටු වෙන්න පුළුවන් දේවල් ඇත්තටම සල්ලි දීලා ගන්න හැකි වෙන්නත් පුළුවන්. නැහැයි කියලද හිතන්නේ? එහෙමනම් බලන්න, සල්ලි දීලා ලබාගන්න පුළුවන් මේ දේවල් වලින් අපිට සතුටු වෙන්න බැරිද කියලා!

 

ආරක්ෂිතව ජීවත් වෙන්න පුළුවන් පරිසරයක් ලැබෙන එක සහ ඒ පරිසරයේ සුවපහසුවෙන් ඉන්න පුළුවන් නිවසක් තියෙන එක කොයි තරම් සැනසිල්ලක්ද? ආන්න ඒ සැනසිල්ල තමයි සතුට. හැබැයි ඉතින් ඒ සැනසිල්ල සතුට ලබන්න සල්ලි ඕන. හැබැයි එකක්. අපිට සුවපහසු, ආරක්ෂිත නිවසක් ලැබුණට පස්සේ ලැබෙන සතුට එහෙම ක්‍රමක්‍රමයෙන් ක්ෂය වෙලා යන එකක් නෙවෙයි. ඊට වඩා ඒක සදාකල් පවතින සතුටක්. ෂුවර් නැද්ද? හිතන්න කොහේ හරි ඉඳලා ගෙදර ඇවිත් තමන්ගේ හුරුපුරුදු ඇඳට වැටෙන එකේ තියෙන සතුට. ඇත්තටම ඒක වෙන්න ඇති ගොඩක් මිනිස්සුන්ගේ ජීවිතේ ලොකු ටාගට් එකක් විදියට තමන්ටම කියලා ඉන්න නිවසක් හදාගන්න එක තියෙන්නේ.

 

ඔන්න හිතන්න අපිට කවුරුහරි රුපියල් කෝටියක් විතර දෙනවා කියලා. අපිට ඉන්න ගෙයක්, අපේ අවශ්‍යතා ඉටුකරගන්න පුළුවන් ආර්ථිකයකුත් තියෙනවා කියලා හිතමු. දැන් එතකොට අපි ඔය රුපියල් කෝටිය අරගෙන මොකද කරන්නෙ? ඒකෙන් ලක්ෂ කීපයක් අරගෙන ෂොපින් යනවා කියමු. එහෙම ගිහින් ගන්නවා කාලයක් පාවිච්චි කරන්න පුළුවන් හොඳ ෆෝන් එකක්. හැබැයි ඉතින් ඒක හරි සතුටක් වෙන්න නම්, දැන් තියෙන ෆෝන් එකේ කාලේ ඉවර වෙලා, කෑලි හැලි හැලී පාවිච්චි කරන්න ඕන. ආන්න එතකොට ඒක අයින් කරල අලුත්ම වර්ගේ ෆෝන් එකක් ගන්න එක නාස්තියක් කියලා අපිට දැනෙන්නෙ නෑ. ආන්න සතුට. ඊට පස්සේ තව අපි ආස ගැජට් බැජට් කීපයක් සමහර වෙලාවට ගන්න පුළුවන්. ඇත්තටම ඒකත් සතුටක් තමයි.  

 

මේක සතුටක් වෙන්නේ සංචාරයට ආස මනුස්සයෙක්ට තමයි. ඇත්තටම ගොඩක් දෙනෙක් ආසයිනේ රට රටවල සංචාරය කරලා, අලුත් රටවල් දැකබලාගෙන, ෂොපින් පාරක් එහෙම දාලා විනෝද වෙන්න. ඒක සතුටක්. ඉතින් එහෙම කෙනෙක්ට තමන්ගේ ආදරවන්තයා හරි ආදරවන්තිය හරි එක්ක කෘස් ෂිප් එකක නැගලා රටවල් කීපයක් අතරේ විනෝද සංචාරයක් ගිහිල්ලා, ඒ අතරේ නවත්තපු රටක හොඳ ෂොපින් පාරක් එහෙමත් දාලා එන එක කොයි තරම් සතුටක්ද? එතකොට ඒ සතුට අපිට ලැබෙන්නේ සල්ලි වියදම් කරලා තමයි.

 

හැබයි එහෙම ලක්ෂ ගණන් වියදම් වෙන්නෙ නැති සංචාරයක් ගැන හිතමු. අපි ඔන්න කීප දෙනෙක් සෙට් වෙලා කඳුකරයේ කෑම්පින් ට්‍රිප් එකක් යනවා. හීනයක් වගේ සුන්දර කඳුකර පළාතක නිස්කලංක තැනිතලාවක ටෙන්ට් එකක් ගහගෙන කෑම්පින් කරන එකේ ආතල් එක දන්නේ ඉතින් ඒවාට ආස අයම තමයි. ඉතින් එහෙම කෑම්පින් වලට ආස කෙනෙක්ට ඒක සතුටක් නෙවෙයිද? කෙනෙක් කියන්න පුළුවන් අර උඩින් කියපු කෘස් ෂිප් එකේ සංචාරෙට වියදම් වෙන ගාණෙන් සීයෙන් එකක් කෑම්පින්ග් ට්‍රිප් එකකට ඕන නම් වියදම් වෙයි කියලා. හැබැයි ඒත් මුදල් නේද? ඉතින් මේ සතුට ලබාගන්නත් මුදල් ඕන තමයි.

 

සමහරු කියනවා බඩගින්නේ හිටපු කෙනෙක්ට පිදුරු වගේ හැපෙන පාන් කෑල්ලක් දුන්නත් ඒක රසමසවුලක් කියලා. ඒක ඇත්ත වෙන්න පුළුවන්. හැබැයි ඇත්තටම රසවත් ආහාර පාන ලබාගන්නා එකේ සතුටක් නැද්ද? හැබැයි ඉතින් ඒක පුරුද්දක් වුණොත් නම් ඒ සතුට නැතිවෙනවා තමයි. අපි උදාහරණයක් ගමු. අපි සාමාන්‍යයෙන් ඉන්නේ ඩයට් ප්ලෑන් එකක නම්, ඒ කියන්නේ දකින දකින රස ආහාර ඔක්කොම කන්නෙ නැතුව පෝෂ්‍යදායී ආහාර විතරක් ගන්නවා නම්, ඉඳලා හිටලා රස කෑමක් කන්න ගියහම ඒක හරිම සතුටක් වෙන්නෙ නැද්ද? හැබැයි ඉතින් ඒකටත් සල්ලි ඕන තමයි.

Sri News Media

LEAVE A REPLY

Please enter your comment!
Please enter your name here