මේ දිනවල ශ්‍රී ලංකාව නියෝජනය කරන බැඩිමින්ටන් ක්‍රීඩක ක්‍රීඩිකාවන් කාර්ය බහුලය.පිරිසක් අප්‍රිකාවේය.තවත් පිරිසක් සිටින්නේ වියට්නාමයේ ය.බහරේනයේ දසක්ම් දක්වමින් සිටින පිරිසක් ද වෙති.
මේ අතර වියට්නාම FELET Vietnam International Series 2024 තරගාවලියට සහභාගි වන රසිඳු හෙන්දහේවා ලකුණු 21-12 සහ 21 – 14 ක් ලෙස මැලේසියාවේ ජොයෙල් ටාන් පරාජයට පත් කළේය.අද ඔහු චීන තායිපේ ක්‍රීඩක ලු වෙයි සමඟ තරග වඳිනු ඇත.මෙම තරගාවලියට සහභාගි වන මධුක දුලාංජන සහ ලහිරු වීරසිංහ පිරිමි යුගල තරග සඳහා සහභාගි වන්නේ අද ය.එසේම වියට්නාමයේදී දසිත්මා ජයතිලක ද කාන්තා කේවල තරග අංශයෙන් තරග වඳින්නට නියමිතය.
බහරේන් හී පැවත්වෙන දෙවන ජාත්‍යන්තර සූරතාවලිය ද ඊයෙ ඇරඹිණි.ඊයේ දවසේදී පැවති කාන්තා සුදුසුකම් ලැබීමේ තරගවලදී ප්‍රධාන තරගාවලියේ තරග වදින්නට ශ්‍රී ලංකාවේ රශ්මි මුදලිගේ සමත් වූවාය.අද සිට ප්‍රධාන තරගාවලියේ පිරිමි අංශයෙන් ආශිංසන හේරත් ද පෙර පැවති තරගාවලියේ කාන්තා අනු සූරිය වූ රනිත්මා ලියනගේද තරග බිමට පිවිසෙනු ඇත.කාන්තා යුගල තරග අංශය නියෝජනය කරන 15 හැවිරිදි සිතුමි ද සිල්වා සහ ඉසුරි අත්තනායක ද මේ තරගාවලියේ කාන්තා යුගල තරග සඳහා සහභාගි වන්නේය.
මේ අතර අප්‍රිකාවේ බොට්ස්වානා හී හෙට ඇරඹෙන තරගාවලියේ දී ශ්‍රී ලංකාවේ හසාරා විජේරත්න සහ හසිනි අම්බලගොඩ ද කාන්තා යුගල තරග අංශයෙන් තරග බිමට පිවිසෙන්නේය.ඡායාරූපයේ සිටින්නේ වියට්කාමයේ පැවත්වෙන තරගාවලියේ දී පළමු තරගය ජය ගත් රසිඳු හෙන්දහේවා ය.
http://www.sportwaynews.com
Sri News Media
