බයික් එකක ටෙක්නිකල් ස්පෙක් එක සරලව කියවමු – Sri News

0
9

ලංකාවේ වසරකට වැඩිපුරම අලෙවි වන වාහන ජාතිය තමයි මෝටර් සයිකල්. මෝටර් සයිකලයක් කියන්නේ ඕනිම කෙනෙකුට සල්ලි ටිකක් එකතු කරගෙන පොඩි ලීස් එකකට වුනත් ගෙදරට ගන්න පුළුවන් බඩුවක් වෙලා. ඉතින් මෝටර් සයිකල් එකක් ගන්න කියල අපි ෂෝරූම් එක්කට ගියත්, එහෙම නැතිනම් ඉන්ටනෙට් සර්ච් ක​ළත් ඒ ස​ඳහන් විස්තර ආදිය හරියට තේරුම් ගන්න අපිට අමාරුයි. එයින් කරුණු කීපයක් අපි සරලව තේරුම්ගන්​න බලමු.

 

බයික් එකක ස්පෙක් එක ගැන කතා කරද්දි ඒකට අදා​ළ මාදිලිය වැදගත් වෙනවා. බයික් කියද්දි ලංකාවේ පාරවල් වල ගොඩක් වෙලාවට දකින්න ලැබෙන්නේ නේකඩ්, ස්ටෑන්ඩර්ඩ් මාදිලියේ බයික් තමයි. හො​ඳට ලස්සනට හැඩකරලා රේස් වලට හදාපු බයික් ස්පෝට් බයික් වෙනවා. ටිකක් උසට තියෙන කටුක පළාත්වල ගමනාගමනයට හදාපු බයික් ට්‍රේල් බයික් නැතිනම් ඕෆ් රෝඩ් බයික් විදියට හඳුන්වනවා. නැගල අහක් වෙලා බිම වාඩිවුනා වගේ බොහොම පාත සීට් එකක වාඩිවෙලා චූන් එකේ යන්න තියෙන බයික් කෘසර් බයික් වෙනවා. කෘසර් එකම ටිකක් මොඩිෆයි කරලා වේගෙනුත් යන්න හදාපු හාලි ඩේවිඩ්සන් වගේ බයික් අයිති වෙන්නේ ටුවරින් බයික් වලට. ඒ වගේම ගියර් නැති, අමාරු නැති ස්කූටිත් තියෙනවා. ඔය විදියට බයික් මාදිලි ගොඩක් තියෙනවා. ඒ ඒ බයික් මාදිලිය අනුව බයික් වල ටෙක්නිකල් ස්පෙක් එක වෙනස් වෙනවා.

 

ඉස්සර ජපානෙන්, යුරෝපෙන් ආපු බයික් යක්ස බරක් තියෙන්නේ. ඒත් දැන් ඉන්දියාවෙන් එන මොඩල් වැඩි බරක් නැහැ. මුල් කාලෙදි මේ ඉන්දියන් බයික් පපඩම් ​වගේ කියලත් අපේ අය කිව්වා. ඒත් ඉන්දියන් බයික් වල තෙල් පිරිමහන්න සහ නිෂ්පාදන වියදම් අඩු කරන්නයි එයාල බයික් සැහැල්ලුවට හදන්​නේ. ට්‍රේල් බයික් එ​හෙම නැතිනම් ඔෆ් රෝඩ් බයික් වලත් සාමාන්‍යයෙන් අනික් බයික් වලට වඩා බර අඩුයි. ඔෆ් රෝඩ් වලදි බයික් එක සැහැල්ලු වෙන තරමට ගල් මුල් උඩින් බයික් එක ගෙනියන්න ලේසියි. ඒ වගේම ස්කූටර් මොඩලුත් සාපේක්ෂව බර අඩුවෙන්න නිෂ්පාදනය කරනවා. ඇමරිකාවේ හෙම දකින්න තියෙන විශාල බයික් සමහරක් ඒවා කිලෝ පන්සීයකටත් වඩා බරයි. කිලෝමීටර දාස් ග​ණන් යන්න විශාල සිලින්ඩර ධාරිතාවෙන් යුතු ඒ බයික් අමුතුවෙන් සැහැල්ලු කරන්න නිෂ්පාදකයෝ උත්සාහ කරන්නේ නැහැ.

 

බලය ගොඩක් වෙලාවට අශ්ව බල වලින් මනිනවා. ඒ වගේම ටෝක් එක නිවුටන් මීටර වලින් මනිනවා. ගොඩක් වෙලාවට බයික් මෙහෙදි වර්ග වෙන්නේ සිලින්ඩර ධාරිතාවයට අනුව. ඒ අනුව 100, 110, 125, 150, 160, 200, 250 ආදී නම්බර් වල බයික් අපිට සුලබව දකින්න තියෙනවා. මේ සිලින්ඩර කැපෑසිටි එක සහ බලය අසමාන වෙන වෙලාවලුත් තියෙනවා. අපි​ට නිතර දෙවේලේ ඇහැ ගැටෙන යමහා එෆ් ඉසෙඩ් 150 සීසී බයික් එකක් ගනිමු. එෆ් සෙඩ් එකේ මැක්සිමම් හෝස් පවර් ස​ඳහන් ​වෙන්නේ 13.2ක් විදියට. ඒත් 125 සීසී කේ ටී එම් ඩියුක් බයික් එකේ පවර් එක 14.5ක් විදියට දැක්වෙනවා. ඒ අනුව සිලින්ඩරේ විශාල වුනාට හැමතිස්සේම ලබාදෙන බලය එක සමාන වෙන්නේ නැහැ. ඒ නිසා බයික් එකක් බලද්දි මැක්සිමම් ටෝක් එක, පවර් එක ගැනත් බලන එක වැදගත් වෙනවා.

 

මයිලේජ් කියලා ඉංගිරිසියෙන් දැක්වෙන තෙල් කිරීම ලංකාවේ දි බයික් එකක් ගැනීමෙදි සෑහෙන වැදගත් සාධකයක් වෙනවා. හීරෝ ස්ප්ලෙන්ඩර්, ඩෝන් වගේ හීරෝ බයික් වගේම සීටී 100 වගේ බජාජ් මොඩලුත් හො​ඳටම තෙල් කරනවා. සමහර බයික් වල ලීටරයට 60-70ටත් වඩා කරනවා කියලා ස​ඳහන් වෙලා තියෙනවා. මෙතනදි නම් බයික් එකේ ස්පෙක් එකට අමතරව පාවිච්චි කරන දෙතුන් දෙනෙකුගෙනුත් අහන්න පුළුවන් නම් වටිනවා. මොකද කවුරුවත් නැති සමතලා පාරක තෙල් පිච්චෙනවාට වඩා අපිට යන්න තියෙන පාරවල් වල තෙල් පාවිච්චිය ටිකක් වැඩිවෙන්න ඉඩ තියෙනවා.

 

Sri News Media

LEAVE A REPLY

Please enter your comment!
Please enter your name here