නියම ලේඩීස්ලා ජෙන්ට්ල්මන්ස්ලා විදියට ෂොපින් මෝල් එකක හැසිරෙන්නේ මෙහෙමයි – Sri News

0
3

ෂොපින් මෝල්ස් නැතිනම් සිංහලෙන් කියන විදියට සුපිරි සාප්පු සංකීර්ණ ලංකාවෙත් දැන් වැහිවැහැලා. සාමාන්‍ය ප්‍රමාණයේ සාප්පු සංකීර්ණ ඕනම ප්‍රධාන නගරෙක කීපයක් හොයාගන්න පුළුවන් වෙනකොට, කොළඹ පැත්තට යනකොට නම් ඉන්ටර්නැෂනල් ලෙවල් එකේ සුපිරි සාප්පු සංකීර්ණ දැන් දකින්න පුළුවන්. ඉස්සරහට ඊටත් වඩා සුපිරි ලෙවල් එකේ ෂොපින් මෝල්ස් කීපයක්ම විවෘත වෙන්නත් නියමිතයි. මේවල ඇත්තටම තියෙන්නේ ෂොපින් කරන්න ගැලපෙන සුපිරි පන්නයේ කඩ සාප්පු විතරක් නෙවෙයි. ෆිල්ම් බලන්න සුපිරි ෆිල්ම් හෝල්, වෙනම ෆුඩ් කෝට්, විනෝද ක්‍රීඩා අංගන වගේ මෙකී නොකී හැම දෙයක්ම මේවා ඇතුළේ තියෙනවා. ඒ විතරක් නෙවෙයි, ෂොපින් නොකළත් ඕනම කෙනෙක්ට ගිහින් ඇවිදලා කරලා විනෝද වෙලා එන්නත් මේ ෂොපින් මෝල් වල ඉඩ තියෙනවා. හැබැයි ඉතින් කොයි තරම් සුපිරි ලෙවල් එකට ඇඳ පැළඳ ගෙන ෂොපින් මෝල් එකකට ගියත්, සමහරු හරියට මැනර්ස් ඇතුව හැසිරෙන්න නම් දන්නෙ නෑ. ඒක අනික් අයට කරදරයක් විතරක් නෙවෙයි, බලාගෙන ඉන්නත් අශෝභනයි. ආන්න ඒ නිසා අපි මේ කියලා දෙන්න යන්නේ ෂොපින් මෝල් එකකට ගිහින් හැසිරෙන්නේ කොහොමද කියන එක.

 

 ඔය කොළඹ අවට තියෙන සුපිරි පන්නයේ ෂොපින් මෝල් එකක පාර්කින් කතන්දරේ ටිකක් සංකීර්ණයි. පුළුවන් තරම් ස්වයංක්‍රීයව පාකින් ගොඩදාගන්න විවිධ තාක්ෂණික ක්‍රම මේ නවීන ෂොපින් මෝල් වල හඳුන්වලා දීලා තියෙනවා. ඉතින් ප්‍රධානම කාරණාව තමයි හරියට, තමන්ට පාක් කරන්න අදාළ කොටසේ, නියමිත ඉඩේ වාහනේ පාක් කරන එක. උදාහරණයක් විදියට මෝටර් සයිකල් ගෙනිහින් කාර් පාක් කරන්න තියෙන තැනක රිංගවන එක වැරදියි. වාහනයක් පාක් කරන්න අවශ්‍ය ප්‍රමාණයේ විදියට ඇඳලා තියෙන අර කහ පාට කොටුව ගණන් නොගෙන ඇදේට, හරහට තමන්ගේ වාහනේ පාක් කරන එකත් වැරදියි. ඊට පස්සේ පැය ගාණක් ෂොපින් මෝල් එකේ ඉඳලා යනකොට පාකින් වලට ගෙවන්නෙ නැතුව ගේම ඉල්ලන එකත් වැරදියි!

 

දැන් ඔය අලුතින් කොළඹ විවෘත කරපු වන් ගෝල්ෆේස්, කලම්බු සිටි සෙන්ටර් වගේ තැනකට සති අන්තෙකට එහෙම ගියොත් ඔළුව කැක්කුම හැදෙන තරමට ගෝසාව. ඇයි? පාසල් යන වයසේ කොල්ලෝ කෙල්ලෝ, තරුණ ගෑණු ළමයි, පිරිමි ළමයි ඇවිත් හරියට අර එක පොදියට කෑ ගහන වඳුරෝ රංචු වගේ. යාලුවෝ සෙට් වුනහම කතා බහ කරන එක, හිනා වෙන එක හරි. හැබැයි අවට ඉන්න අනික් අයටත් කන්දොස්කිරියාවක් වෙන විදියට මහ හයියෙන් කෑ ගහන එක, තරුණ මදේ පෙන්නන එක නම් හරිම කැතයි. අන්න ඒ නරක පුරුදු කවුරු වුනත් හදාගන්න ඕන.

 

මෙන්න මේක ෂොපින් මෝල් එකක විතරක් පිළිපදින්න ඕන කාරණයක් නෙවෙයි. පොදුවේ කොහේදී වුනත් තියෙන්න ඕන හොඳ ආචාර ධර්මයක්. ෂොපින් මෝල් එකකට ඇවිත් ඒකේ ඉන්නේ තමන් විතරයි කියලා හිතාගෙන හැසිරෙන එක හොඳ නෑ. ඒ කියන්නේ මිනිස්සුන්ව තල්ලු කරගෙන යන එක, මිනිස්සුන්ට ඉඩ නොදෙන එක, එලිවේටර් එකකට නැග්ගහම ඒක බදු අරගෙන වගේ හැසිරෙන එක මෙන්න මේ විදියේ නොකළ යුතු දේවල්. එතකොට ෂොපින් මෝල් එකකට ගිහින් වින්ඩෝ ෂොපින් කරන එක, ඒ කියන්නේ ඒ වල තියෙන බඩු දිහා වීදුරුවෙන් බල බලා ෆන් එකක් ගන්න එක ගැටළුවක් නෑ. හැබැයි බඩු ගන්න අයටත් බාධා වෙන විදියට සාප්පු වල දොරකොඩ, වීදුරු ඉදිරිපිට කල්ලි ගැහිලා ඉන්න එක හැමෝටම කරදරයක්.

 

ෂොපින් මෝල් එකකට ගියහම හිසරදේ හැදෙන තවත් දෙයක් තමයි, හරි වේගෙන් යන්නේ නැති මිනිස්සු. මේක දෙකොටසකට බෙදෙනවා. එක කොටසකට කරදාසිය ලිපේ දාලා ඇවිල්ලා පුදුම හදිසියක්. ඉස්සරහින් යන මිනිස්සුන්ව තල්ලු කරගෙන, ඇඟේ හැප්පීගෙන කඩිමුඩියෙන් යන්නේ. දෙවෙනි කොටසට ෂොපින් මෝල් එකකට ගියාට පස්සේ ඉස්සරහට යන්න කිසීම උනන්දුවක් නෑ. ගැන්සිය පිටින් හිනා වෙවී, කතා කර කර ඉස්සරහට යන නොයන වේගෙන් පැද්දෙන්නේ හරියට හෙමීට බයිසිකල් පැදීමේ තරගෙකදි වගේ. ඉතින් ඊට පිටිපස්සෙන් එන මිනිස්සු ඉන්න ඕන මුන් ටික එහාට මෙහාට වෙනකල්. එහෙම නෙවෙයි. ෂොපින් මෝල් එකකට ගියාට පස්සේ සාමාන්‍ය වේගෙකින් යන්න වෙනවා. එහෙම නැතුව හෙමීට ගමන් කරනවා නම් අයිනකට වෙන්න ඕන. කයිය ගහනවා නම් ඔය නවීන ෂොපින් මෝල් වල ඒවලටත් විවිධ තැන් හදලා තියෙනවා. ඔය ලස්සනට ගස් වවපු, මුළු කොළඹම පේන බැල්කනි එහෙම ෂොපින් මෝල් වල හදලා තියෙන්නේ ඒවලට.  

 

Sri News Media

LEAVE A REPLY

Please enter your comment!
Please enter your name here