නිට්ටෑවෝ යනු මෙහි ජීවත් වූ මානවයෙක්ද? – Sri News

0
3

නිට්ටෑවෝ වැනි කුඩා මිනිසුන් ඇතැම් රටවල ගෝත්‍රිකයින් ලෙස තවමත් ජීවත් වේ. ඉන්දුනීසියාව, තායිලන්තය වැනි රටවල පිග්මි හෙවත් කුරු ගෝත්‍රිකයින් තවමත් තැන තැන සිටිති. එසේම අන්දමන්, නිකොබර් සුලවැසි වැනි දිවයින් වල ආසියාවේ කහ පැහැයට වෙනස් කළු පැහැති සමක් ඇති මිනිසුන් තවමත් ජීවත් වේ. ඒ ආකාරයෙන් අපේ යාබද ඉන්දියාව ගත්තද විවිධ අන්දමේ ගෝත්‍රිකයින් රැසක් තවමත් සිටී. ලංකාවේ දැනට සිටින ආදිවාසීන් වැද්දන් වන අතර ඉන් එහා ආදිවාසීන් යැයි සැලකිය හැකි විශේෂයක් ඉතිරිව නැත. එහෙත් නිට්ටෑවන් විටින් විට අප පුවත්පත්, ෆේස්බුක් තුළට එබිකම් කරයි. කවුරුද මේ නිට්ටෑවෝ? අපි ටිකක් සොයා බලමු.

 

ඉන්දුනීසියාවේ පලාවු දිවයින් වල කරන ලද කැණීම් වලදී 2003 වර්ෂයේදී ඇට කැබලි රැසක් සොයාගත් අතර ඒවා මීටරයක පමණ උසැති මිනිසකුගේ බවට මත පළ විය. ඒ මානව වර්ගය හොබිට් ලෙස හඳුන්වන ලද අතර හෝමෝ ෆ්ලොරෙන්සින්සිස් ලෙස වර්ගීකරණය කරන ලදී. මොළයේ ප්‍රමාණය, මුහුණ සහ අස්ථි වල හැඩය අනුව ඔවුන්ද හෝමෝ සේපියන් සේපියන් හෙවත් අපි අයිති කාණ්ඩයටම අයිති විය යුතු බවට මත පළවී තිබේ. මේ ආකාරයෙන් සාමාන්‍ය මිනිසාට වඩා කුඩා මිනිසුන් අපට යාබද සුමාත්‍රාවෙන්ද සොයාගෙන තිබේ. ඒ අනුව කලකදී ලංකා දිවයිනේද මෙම කුඩා මානවයින් සිටියාද යන ගැටළුව ඇතිවේ. එහෙත් එසේ සිටියා වුවද ඉතා මෑතකදී ඔවුන් විසුවායැයි සිතීම විද්‍යාත්මක නොවේ.

 

වැද්දන්ගේ ජනප්‍රවාද අධ්‍යනය කළ කිහිප දෙනෙක්ම යුරෝපීය යටත්විජිත යුගයෙත් ලංකාවේ සිටියහ. වැදි ජනප්‍රවාද අනුව මේ නිට්ටෑවන්ව වැද්දන් විසින් සමූලඝාතනය කර තිබෙන්නේ ගුහාවක් තුළට නිට්ටෑවෝ බහා එය ගිනි තැබීමෙනි. වැද්දන් සහ නිට්ටෑවන් එකම බිමක ජීවත් වුවද වැද්දන්ට වඩා නිට්ටෑවන් බුද්ධි මට්ටමින් අඩුය. එසේම වැදි ගැහැණුන් සමග ලිංගිකව හැසිරීමද නිට්ටෑවන්ව වැද්දන්ට එපා වීමට එක හේතුවකි. එබැවින් වැද්දන් විසින් නිට්ටෑවන් සමූල ඝාතනය කළ බවට කතාන්දර තිබේ. එහෙත් ඒ වැද්දන් හා එකම කල විසුවායැයි කියන එකදු නිට්ටෑවකුගේ හෝ ආයුධ හෝ වෙනත් කිසිදු පුරාවිද්‍යාත්මක සාධකයක් මෙතෙක් හමු වී නැත. හුදෙක් ජනප්‍රවාද වල පමණක් නිට්ටෑවා සුවසේ ජීවත් වේ.

 

පිග්මිවරු යනු උසින් අඩු කාලවර්ණ මිනිසුන් වර්ගයකි. ඔවුන් අද ද ජීවත් වේ. ඔවුන් ගිනිකොණදිග ආසියාවේ මුල් පදිංචිකරුවන් යැයි කියති. එසේම අන්දමන් දූපත් ආශ්‍රිතව වෙසන කළු ජාතිකයින් ආසියාවට කොහෙන් කෙසේ පැමිණියාදැයි තවමත් විද්‍යාඥයින්ට ඇත්තේ ගැටළුවකි. ඉන්දුනීසියාව, පැපුවා නිව් ගිනියාව, අන්දමන් දූපත්, තායි රට වැනි රටකින් මෙහි ගෙන ආ පිග්මිවරුන් බියට කැලෑ වැදීම නිසා ඇතැම්විට මේ කියන නිට්ටෑවුන් ඇතිවූවා වන්නට හැකිය. යටත්විජිත පාලකයින්ගේ මුල් කාලය යනු ලෝකයේ වහල් මෙහෙය අනුමත යුගයක් විය. එකලදී වහලුන් ලෙස අල්වාගත් කිහිප දෙනෙක් වල් වැදී නිට්ටෑවුන් ලෙස කැලෑගත වූවාදැයිද සිතීමට අවකාශ තිබේ.

 

දැනට නැගෙනහිර කලාපයේ පානම කුඩුම්බිගල පළාත නිට්ටෑවන් විසූ කලාපයක් යයි විශ්වාස කෙරේ. එසේම මහ ලේනම බින්තැන්න ආදී කලාපවලද නිට්ටෑවන් සම්බන්ධ ජනප්‍රවාද තිබේ. තවමත් මේ ඇතැම් ප්‍රදේශ යාල මහ කැලයටත් ජන ශුන්‍ය වනාන්තර භූමි වලටත් යාබද වීම නිසා දැනටද ඒ පළාත්වල ඇතැම් කලාප වැඩිපුර මිනිස් ග්‍රහණයට හසු වී නොමැත. මේ නැගෙනහිර සහ ගිනිකොණදිග වෙරළබඩ කලාපය දැන් කාලයේ එතරම් ජනාකීර්ණ නොවන නමුදු අතීතයේදී මේ කලාපය වඩාත් සක්‍රීයව පවතින්නට ඇති බවට ඒ කලාපයෙන් තැනින් තැන හමුවන පුරාවිද්‍යා සාධක අනුව පෙනේ.

 

Sri News Media

LEAVE A REPLY

Please enter your comment!
Please enter your name here