එම විමර්ශනය කඩිනමින් අවසන් කරනු දැකීම සිය අපේක්ෂාව බවයි කතෝලික සභාව සඳහන් කරන්නේ.
චැනල් ෆෝ නාලිකාවේ විකාශය වූ වාර්තා වැඩසටහන සම්බන්ධයෙන් නිසි විමර්ශනයක් පවත්වන ලෙස හිටපු ජනාධිපති රනිල් වික්‍රමසිංහ මහතාගෙන් ඉල්ලා සිටියද එම ඉල්ලීම ඉටු නොවුණු බවයි කතෝලික සභාව වෙනුවෙන් සිරිල් ගාමිණී පියතුමා පවසන්නේ.
නිසි විමර්ශනයක් නොකර චැනල් ෆෝ චෝදනා පිළිබදව සොයා බැලීම සදහා කමිටුවක් පත් කළ නමුත් එම කමිටුව පිළිබදව කිසිදු විශ්වාසයක් නැති බව ඒ මොහොතේම ප්‍රකාශ කළ බවද සිරිල් ගාමිණී පියතුමා කියාසිටිති.
කෙසේවෙතත් නව රජය පත්වීමෙන් පසු පාස්කු ප්‍රහාරය පිළිබදව චැනල් ෆෝ නාලිකාව විකාශය කළ වාර්තා වැඩසටහනෙන් ඉදිරිපත් කර තිබෙන චෝදනා සම්බන්ධයෙන් අපරාධ පරීක්ෂණ දෙපාර්තමේන්තුව ආරම්භ කර තිබෙන විමර්ශන වලට අදාළව හිටපු රාජ්‍ය අමාත්‍ය ශිවනේෂතුරෙයි චන්ද්‍රකාන්තන් ඊයේ දිනයේ දී අපරාධ පරීක්ෂණ දෙපාර්තමේන්තුවට කැදවා තිබුණි. එහෙත් ඔහු අපරාධ පරීක්ෂණ දෙපාර්තමේනතුව මග හැර ඇති බව වාර්තා වෙයි.
පාස්කු ප්‍රහාරය සම්බන්ධයෙන් චැනල් ෆෝ නාලිකාවට හිටපු රාජ්‍ය අමාත්‍යවරයාගේ හිටපු ලේකම්වරයෙකු වන අසාද් මව්ලානා නැමැත්තා කළ කරුණු දැක්විමක් සම්බන්ධයෙන් ප්‍රකාශයක් ලබාගැනිම සඳහායි ඔහුව කැඳවා ඇත්තේ.
පසුගිය වසරේ සැප්තැම්බර් මස 6 වනදා විකාශය වු එම විඩියෝවේ හිටපු රාජ්‍ය බුද්ධි අධ්‍යක්ෂ මේජර් ජෙනරල් සුරේෂ් සලේ සහ පාස්කු ප්‍රහාරයේ බෝම්බකරුවන් අතර පැවති බව කියන හමුවක් පිළිබඳව හා ඊට හිටපු ජනාධිපති ගෝඨාභය රාජපක්ෂ මහතාගේ සම්බන්ධතාවක් පිළිබඳව ද තොරතුරු ඉදිරිපත් කර තිබුණි.
Sri News Media
