ගෙයක් හදනකොට වියදම අඩුකරගන්න පුළුවන් ක්‍රම – Sri News

0
6

ගෙයක් හදන එක ලේසි වැඩක් නෙමෙයි. ඒත් අමාරුයි කියලා බැහැනෙ. ගෙයක් හදාගන්නම වෙනවා අලුතින් පවුලක් වෙනවා නම්. ඊට අමතරව අපේ දූලා පුතාලට හෙමත් අපිට ගෙවල් දොරවල් හදාදෙන්න වෙනවා. අපේ තියෙන ගේ වුණත් ටිකක් මොඩිෆයි කරලා ගන්න පුළුවන් නම් ඒකෙත් යම් ගතියක් තියෙනවා. ඉතින් ඒ මොන වැඩේ කරන්න ගියත් අපිට සල්ලි කියන බාධකය හරස් වෙනවා. ඉතින් මේ සල්ලි නාස්තිය අඩුවෙන් කොහොමද වැඩේ ගොඩදාගන්නේ කියලා අපි බලමු.

 

බාස්ලාගේ, කොන්ත්‍රාත්කරුවන්ගේ එක ආදායම් මාර්ගයක් තමයි බඩුවලින් ගහන එක. ඒ කිව්වේ ඔයා ගන්නේ සිමෙන්තිද? හුණුද? තීන්තද? ටයිල්ද? කියන එක අදාළ නැහැ. ඒ බාස්වරු සහ කොන්ත්‍රාත්කරුවන් සම්බන්ධ කරගෙන එයාල හරහා ගත්තොත් ඔයාලට අවාසි වෙන්න යම් ඉඩක් තියෙනවා. ඇරත් ගෙදර හදලා ඉවර වුණාම ඒකේ ජීවත්වෙන්නේ  බාස්ලා නෙමෙයි අපි. ඒ නිසා අපේ කොලිටියට, අපි කැමති පාටට ඩිසයින් එකට, ගෙදර නිමාවට අවශ්‍ය වෙන බඩු ආදිය මිලදී ගන්න අපිම යනවා නම් හොඳයි. සමහර වෙලාවට බාස් වරු හෙම අච්චර මෙච්චර අඩුවට බිල්ඩින් මැටීරියල් තියෙනවා කියලා කියනවා. ඒවා වුණත් අපි තැන් කිහිපයකින් අහලා බලලා අපිත් සොයලාම ඒ දේවල් මිලදී ගන්න එක පර්ස් එකට හොඳයි.

 

නිදන කාමරයක් නම් කාමරේ බිත්ති වලට, ටයිල් වලට, වහලට ලොකු වියදමක් කරන එක තේරුමක් නැහැ. ගෙයක් නම් වැඩිම පිරිසකගේ ඇහැ යන්නේ ගෙදර සාලයට, කුස්සියට සහ කෑම කාමරයට. ඒ වගේ තැන් වඩාත් ලස්සන වෙන්නත්, එළිමහන් සහ කාමර වැනි පුද්ගලික අවකාශයන් එතරම්ම සුපිරියට නොවෙන්නෙත් හදාගත්තොත් එයිනුත් අපිට යම් ඉතුරුවක් කරගන්න පුළුවන් වෙනවා. 

ඒ වගේම ගෙයක් හදාගෙන යද්දී අරහෙම කරමු මෙහෙම කරමු කියලා යම් යම් වෙනස්කම් කරන්න​ට සමහර බාස්වරුන්ගෙන් යෝජනා එන්න පුළුවන්. ඒ විදිහේ දේවල්වලින් නිවසට වාසියක් අත්වෙනවාද? නැතිනම් ඒ අයගේ වර්ගමීටර ප්‍රමාණය ඇතුළු කුලිය වැඩි කරන්න කියන දේවල්ද කියන එක ගැනත් ටිකක් හිතන්න.

 

බාස්ලා හැදුවත්, කොන්ත්‍රාත්කරුවන් හැදුවත් ගෙයක් හදනවා නම් දවස් කීපෙකට වතාවක් හරි ඒ පැත්තේ ගිහින් බලන එක වටිනවා. බිරින්දෑ හෝ සැමියා හෝ පෙම්වතා පෙම්වතිය ඉන්නවා නම් එයාලත් එක්කත් අලුත හදන ගෙදර බලන්න යන එක වටිනවා. ගෙදර නිකං ප්ලෑන් එක උඩින් බැලුවට හෝ එවෙලේ බැලුවට අවකාශ ගැන හරිහමන් අදහසක් එන්නේ නැහැ. ඉතින් මගදි හදනකොටම අපිට යම් යම් දේවල් වෙනස් කරගන්න පුළුවන්කම ලැබෙනවා හදන ගෙදර නිතර ගිහින් බැලුවොත්.

 

අපිට ගේ වෙනුවෙන් කරන්න හැකි වියදම, ගේ හදන්න ඉන්න බිම, ගෙදර තියෙන අවකාශ ආදී දේවල් ගැන කලින් හිතලා ප්ලෑන් එකක් ගහගන්න එක වටිනවා. මේ ප්ලෑන් වැඩේදි ගෙදර හදන්න යන වියදම අඩුකරගන්න ඔයාලට තියෙන උවමනාව ගැනත් කියන්න. ඒ වගේම ඒ ප්ලෑන් අකාරේ ගෙයක් කොහෙහරි හදලා තියේ නම් ඒක ගිහින් ටිකක් බලලා එන්න පුළුවන් නම් ඒකත් වටිනවා. අපිත් ආසයි දිව්‍ය විමාන වගේ සුන්දර විසාල ගෙවල් වලට. ඒත් හැදෙන්නෙ නැති, තැන තැන කොන්ක්‍රීට් සහ ගඩොල් ගොඩගහපු බාග ගේක අවුරුදු විස්සක් තිහක් කල් මරණවාට වඩා පොඩියට කාමර දෙකක්, සාලයක් හරි හරියට හදාගෙන ඒකේ ජීවත් වෙන්න උත්සාහ කරන එක මෙලොවට වටිනවා.

 

Sri News Media

LEAVE A REPLY

Please enter your comment!
Please enter your name here