කොරෝනා සමයේ ආරක්ෂිතව සාප්පු සවාරි යන්නේ කොහොමද? – Sri News

0
3

ළඟ එන සිංහල හින්දු අලුත් අවුරුද්දට ලහි ලහියේ සුදානම් වෙන ගමන් අමතක කරන්නම බැරි වැදගත් කාරණාවක් ගැන තමයි මේ කියන්න යන්නේ. අවුරුදු කිව්වම ඉතින් අපිට ඉස් ඉස්සෙල්ලාම මතක් වෙන්නේ සාප්පු සවාරිනෙ. ඔන්න මේ පාරත් අවුරුද්ද යන්තම් ලං වේගෙන එනකොටම කට්ටිය පාරට බැහැල සාප්පු සවාරි පටන් අරගෙන. හැබැයි මේ පාර වෙනදට වඩා වෙනස්, අපිට අමතක කරන්නම බැරි කාරණාවක් තියෙනවනේ. ලංකාවේ අපි විතරක් නෙමෙයි. මුළු ලෝකයම ඉන්නේ දරුණු කොරෝනා වසංගතයට මැදිවෙලා. ඉතින් ෂොපින් කරන්න යනවනම් මේ ගැන ලොකු අවධානයක් දෙන එක අපි හැමෝගෙම වගකීමක්.මොකද සමාජයේ ජීවත්වෙන පුරවැසියන් විදිහට අපි මේ රෝගයෙන් ආරක්ෂාවෙන එක වගේම අනික් අයගේ ආරක්ෂාව තහවුරු කරන එකත් අපේ අතේ තියෙන වැඩක්නේ. ඒ නිසා කියවලම බලමු කොරෝනා සමයේ තමන්ගේ වගේම අනිත් හැමෝගෙම ආරක්ෂාව තහවුරු වෙන විදිහට සාප්පු සවාරියේ යෙදෙන්නේ කොහොමද කියල. 

 

ඔන්න මුලින්ම මතක තියාගන්න ඕනෙ අපි මේ ෂොපින් යන්නෙ නොයාම බැරි නිසයි. ඒ කිව්වේ අත්‍යාවශ්‍යම දේවල් ගන්න විතරක් මේ වතාවේ ෂොපින් කිරීම සිමා කරන්න. හිතේ හැටියට ආපහු ෂොපින් කරන්නනම් මේ වසංගතය ඉවරවෙන කාලයක් වෙනකන්ම ඉන්න වෙනවා. ඊළඟට ගෙදරින් එක්කෙනෙක් හෝ උපරිම දෙන්නෙක් මේ වැඩේට සහභාගී වෙන්න. පොඩි දරුවන් එහෙම හැකි තරම් ගෙදර තියලා යන්න. 

ඊළඟට පුළුවන් තරම් සෙනඟ අඩු දවස් මේ ෂොපින් කිරීමට තෝරගන්න. කලින් වගේ එක එක ඩිස්කවුන්ට් තියෙන දවස්, නිදහසේ යන්න පුළුවන් නිවාඩු දවස් තෝරගෙන ෂොපින් කිරීම මේ වතාවේ අවදානම්. ඒ නිසා පුළුවන් තරම් සෙනඟ අඩුවෙන් ඉන්න දවසක් මේ වැඩේට තෝරගන්න. තදබදය අඩුවෙන තරමට මේ නපුරු රෝගය පැතිරීමේ සම්භාවිතාව හුඟක් දුරට අඩුයි.

 

ඊළඟට ගෙදරින් යන්න කලින් යන ගමනේ සියලු විස්තර ප්ලෑන් කරගෙන යන්න. ගන්න අවශ්‍ය ඇඳුම් පැළඳුම්, භාණ්ඩ මොනවද, ගන්න තැන මොනවද කියන සියලුම විස්තරය ප්ලෑන් කරගෙන යන්න. එතකොට ගතවෙන කාලය වගේම පාරේ වෙන අනවශ්‍ය රස්තියාදුව අඩුයි. ඒකෙනුත් වෙන්නෙ අවදානම අඩුවෙන එකයි.

වෙන වතාවල් වල වගේ මහන්සියට පාරේ පේස්ට්‍රි ෂොප් වලින් කෑම කන්න තියාගන්න එපා මේ වතාව. පුළුවන් තරම් ඉක්මනට ගිහින් වැඩේ කරගෙන ඉක්මනට එන්න.

 

අමතක නොකර මාස්ක් අරගෙන යන්න. විශේෂයෙන්ම එකකට වඩා අරගෙන යන්න. මගදී මාස්ක් එකක් කැඩුනත්, හැලුනත් අවදානමක් ගන්න ඕන නැහැනේ. ඒ වගේම හෑන්ඩ් සැනිටයිසර් එකක් බෑග් එකේ දාගෙන යන්න. ෂොප් එකකට ඇතුල් වෙන තැනදී අත් හේදුවට ඇතුළට ගියාට පස්සෙත් අල්ලන අල්ලන ඇඳුමක්, බඩුවක් ගාණෙත් අත්දෙක සැනිටයිස් කරගන්න අමතක කරන්න එපා.

 

ලේසියට, හදිස්සියට ෂොප් එකට ඇතුල්වෙන තැන තියෙන තොරතුරු පොත උඩින් පල්ලෙන් පුරවන්න එපා. එක්කො බාර්කෝඩ් එක හරියට ස්කෑන් කරන්න. එහෙමත් නැත්තම් පොතේ ඉල්ලලා තියෙන ඔක්කොම තොරතුරු වෙලාව අරගෙන පැහැදිළිව පුරවන්න. රෝගය පැතිරීම ගැන හරියට ට්‍රැක් කරන්න වගේම ඒ පැතිරීම සීමා කරන්නත් මේ තොරතුරු හුඟක් උදව් වෙනවා.

Sri News Media

LEAVE A REPLY

Please enter your comment!
Please enter your name here