ඔන්ලයින් පොත් මිලදී ගන්නකොට, යහපත් පාරිභෝගිකයෙක් වෙන්න නම් මේ විදියට වැඩ කරමු! – Sri News

0
6

සාමාන්‍යයෙන් ඉස්සර නම් අපි පොත් ගන්නේ කොහොමද? ඔන්න අපි පොත් කඩේකට යනවා. ඊට පස්සේ රාක්ක අතරේ ඇවිදගෙන ගිහිල්ලා අපිට හිතට අල්ලන පොත් තෝරනවා. ඒවල පිටකවරේ අතපත ගාලා බලනවා. පොඩ්ඩක් අතට අරගෙන පිටුවක් දෙකක් කියවනවා. පොතේ පිටිපස්ස කවරේ එහෙමත් කියවනවා. සමහර වෙලාවට පොත් කඩේ වැඩකරන කෙනෙක්ගෙන් හරි, පොත් කඩේ මුදලාලිගෙන් එහෙමත් විස්තර අහනවා. එහෙම කරලා ඒ පොත සෙට් වෙනවා නම් ගන්නවා. ඊලඟට තව පොතකට යනවා. ඔහොමනේ වෙන්නේ. හැබැයි දැන් කාලෙත් එක්ක තාලේ ටිකක් වෙනස්. දැන් කාලේ අපිට පොත් ගෙදර ඉඳන්ම තෝරගෙන, ගෙදර ඉඳන්ම සල්ලි ගෙවලා, ගෙදරටම ගෙන්න ගන්න සෑහෙන්න තැන් තියෙනවා. ඔන්ලයින් පොත් කඩ කියන්නේ එව්වට. සමහර වෙලාවට අපිට ඔන්ලයින් වෙබ්සයිට් එකකින් පොත් තෝරගෙන ගෙන්න ගන්න පුළුවන්. තවත් සමහර වෙලාවට අපිට ෆේස්බුක් පේජ් එකකින් වගේ විස්තර බලලා, එතනින් කෙලින්ම ඕඩර් කරලා ගෙන්න ගන්නත් පුළුවන් .

 

හැබැයි ඉතින් අර ඇත්තටම පොත් කඩේකට ගිහින් පොත් ගන්නකොට වුණත් ඒ වැඩේ කරන හරි ආචාරශීලී විධි තියෙනවනේ. ඔන්ලයින් පොත් ඕඩර් කරනකොටත් අපි පාරිභෝගිකයෙක් විදියට පිළිපදින්න ඕන දේවල්, හොඳට හැසිරෙන්න ඕන විධි තියෙනවා. ආන්න ඒ දේවල් ටිකක් තමයි මේ සාකච්ඡා කරන්නේ!

 

මෙන්න මේක නම් ඉගෙන ගන්න ඕන ප්‍රධාන කාරණයක්. ඒ තමයි ඔක්කොටම කලින් දෙයක් ගැන තියෙන විස්තර ටික කියවන එක. සමහරු ඉන්නවා, පොත් කියවන්න ඕන කියලා පොත් ගන්න ගියාට, පොතේ මිල ගණන් වල ඉඳන් දාලා තියෙන විස්තර ටික කියවන්න කම්මැලියි. එහෙම නැතිනම් ඒ විස්තර ටික කියව කියවා ඉන්න බැරි තරමට හදිසියි. ඉතින් එක්කෝ ෆේස්බුක් එකේ එහෙම නම් පොතේ ගාණ කීයද, ඩිලිවරි චාර්ජස් කීයද, කවදටද එවන්න පුළුවන්, කවදටද ගන්න පුළුවන්, පොතේ පිටු කීයද යනාදී දහසකුත් එකක් ප්‍රශ්න අහලා එක්කෝ කමෙන්ට් කරනවා. නැතිනම් ඉන්බොක්ස් කරනවා. ඉතින් පුළුවන්ද වැඩේ කරන්න! 

 

ගොඩක් වෙලාවට බඩුවක් මුට්ටුවක් විකුණන, වැඩේ දන්න මනුස්සයෙක් නම් පාරිභෝගිකයාට අවශ්‍යයි කියලා හිතාගන්න පුළුවන් සියළුම විස්තර තමන් දාන ඇඩ් එකේ නැතිනම් විස්තරේ ඇතුළත් කරනවා. එතකොට අපිට ඒක සාවධානව කියවන්න පුළුවන් නම්, අවශ්‍ය විස්තර ඔක්කොම දැනගන්න පුළුවන්. එහෙම කියවලත් අපිට යම් කිසි වෙනස් දෙයක් දැනගන්න අවශ්‍ය නම් ඔන්න ඉන්බොක්ස් කරලා හරි කමෙන්ට් කරලා හරි අහන්න පුළුවන්!

 

“අයියෝ රුපියල් හත්සීයක් මේ පොතට වැඩියි. අඩු කරලා ගන්න බැරිද?” ඔන්ලයින් පොතක් මිලදී ගන්න ගියහම අන්න එහෙම අහන පාඨකයොත් නැතිනම් පාරිභෝගිකයොත් ඉන්නවා. ඒක එතකොට වැරදිද? වැරැද්දක් නැහැ. හැබැයි පොත් මිලදී ගැනීමෙදී ඒක ප්‍රායෝගික නෑ. පොළේ එළවළු ගන්න ගියහම නම් ඒක අවුලක් නැතිවෙන්න පුළුවන්. මොකද පොතක මිල කලින් නියම වෙලා තියෙන්නේ. අන්න එතකොට ඒ පොතට වට්ටමක් දුන්නොත් ඇරෙන්න වෙන මිල අඩු කිරීමක් කරන්න අමාරුයි. එතකොට දෙන ඩිස්කවුන්ට් ගැන වුණත් මුලින්ම ප්‍රකාශකයා පැහැදිලිවම කියනවනේ. අන්න එතකොට ආයෙමත් තව අඩු කරන්න බැරිද, තව ඩිස්කවුන්ට් එකක් දෙන්න බැරිද කිය කියා වාත වෙන්න යන එක පොඩ්ඩක් අප්සට්.

 

අපි පටන් ගන්නකොටත් කිව්වනේ පොත් කඩේකට ගිහින් හොඳ පොතක් තෝරගන්නේ කොහොමද කියන එක ගැන. ගොඩක් වෙලාවට අපි පොත එහෙන් මෙහෙන් කියවලා බලනවා. ඇත්තටම ඔන්ලයින් පොත් ගන්නකොටත් අපිට ඒ හා සමාන හැකියාවක් තියෙනවා. දැන් ඔය ඔන්ලයින් පොත් විකුණන වෙබ් අඩවි වල තියෙන පහසුකමක් තමයි ඒ ඒ පොතේ පිටු කීපයක් කියවන්න පහසුකම් සපයන එක. ෆේස්බුක් එකෙන් පොත් විකුණන තැන් වලත් සමහර වෙලාවට ඒ පහසුකම තියෙනවා. අන්න එතකොට ඒ හැකියාව භාවිතා කරන්න. පොඩ්ඩක් පොතේ පිටු කීපයක් කියවලා ඉන්න. එහෙම පොතේ පිටු කීපයක් කියවන්න අවස්ථාව දීලා නැතිනම්, අපිට ඒ අදාළ වෙබ් අඩවියෙන් හෝ ෆේස්බුක් පේජ් එකෙන් හෝ ඉල්ලීමක් කරන්නත් පුළුවන්.

 

Sri News Media

LEAVE A REPLY

Please enter your comment!
Please enter your name here