අභිරහස් ලෙස මියගිය රාජ්‍ය නායකයෝ – Sri News

0
2

සමහර අය මැරු​ණයි කියලා අපිට අදහගන්න බෑ. කෙනෙක් අඩු වයසින් මැරෙනවා නම් හරි හදිසි අනතුරකින් මැරෙනවා නම් හරි අපි ගොඩක් දුරට ඒ මරණය ස්වාභාවිකවම සිද්ධ වුණු දෙයක්ද කියලා  දැනගන්න පෙළඹෙන්නේ නිරායාසයෙන්. මේක සාමාන්‍ය තත්ත්වයක්. මේ ස්වභාවය අපේ එදිනෙදා ජීවිතයේ විතරක් නෙමෙයි ලෝක දේශපාලනය තුළත් දක්නට ලැබෙනවා. විශේෂයෙන්ම දේශපාලනඥයෙක් නොසිතූ විරූ වෙලාවක මිය ගියොත් අපි හිතන්නේ මේ මරණය පිටිපස්සේ අපි නොදකින යමක් තියෙන්න පුළුවන් කියලා. ඉතිං අපි අද හිතුවා ඒ වගේ විවිධ කතා ඇහෙන, ගොඩක් අය අභිරහස් ලෙස මිය ගියා කියලා විශ්වාස කරන දේශපාලනඥයන් කීප දෙනෙකුගේ මරණ ගැන කතා කරන්න.

 

ඩැග් හැමර්ෂල් කියන්නේ දේශපාල​නඥයෙක් නම් නෙමෙයි. ඔහු දේශපාලනඥයින්ටත් වඩා උඩින් හිටපු කෙනෙක්. ඒ ඔහු එක්සත් ජාතීන්ගේ සංවිධානයේ මහ ලේකම් ධූරය දරපු නිසා. 1961 වර්ෂයේ දී සැම්බියාවේ සිදු වූ ගුවන් අනතුරකින් ඔහු මිය ගියා. ඒ වන විට ඔහු කොංගෝ අර්බුදය සම්බන්ධයෙන් යම් එකඟතාවයක් සකස් කිරීමට යමින් සිටියා. හිටපු ඇමරිකානු ජනාධිපතිවරයෙකු වුණු හැරී ටෲමන් පවා විශ්වාස කළේ මෙය ඝාතනයක් කියලා. මීට සී.අයි.ඒ සංවිධානය සහ බෙල්ජියමේ විවිධ සමාගම් සම්බන්ධ වුණා කියලා කතා බහක් ඒ දවස්වලම ඇති වුණා. 2015 වර්ෂයේදී එක්සත් ජාතීන්ගේ සංවිධානයේ මහ ලේකම්වරයා වූ බැන් කී මූන් විසින් විශේෂ කමිටුවක් ඩැග් හැමර්ෂල්ගේ මරණය පිළිබඳව සෙවීමට පත් කරනු ලැබුවා. ඒ කමිටු වාර්තාවෙන්  පවා ගුවන් අනතුරට නිසි හේතුවක් අනාවරණය කරගැනීමට නොහැකි වුණා.

 

පාකිස්ථානයේ හමුදා පාලකයෙකු වූ ජෙනරල් සියා උල්හක් පිළිබඳව පාකිස්ථානය තුළ ඇත්තේ මිශ්‍ර හැඟීමක්. හමුදා කුමන්ත්‍රණයක් මගින් රටේ බලය අල්ලා ගත් ඔහු රට තුළ මූලික මානව අයිතිවාසිකම් පවා රැකීමට උනන්දුවක් දැක්වූ​යේ නැහැ. නමුත් ඔහුගේ කාලය තුළ පාකිස්ථානය විශාල ආර්ථික දියුණුවක් ලබා ගත්තා. ඒ වගේම පාකිස්ථානය න්‍යාෂ්ටික බලවතෙකු කරා යන ගමනේ වැදගත් කාර්යභාරයක් සියා උල් හක් විසින් ඉෂ්ට කරා. ඔහුත් මිය ගියේ ගුවන් යානා අනතුරකින්. ඒ අනතුරෙන් එවක පාකිස්ථානයේ සිටි ඇමෙරිකානු තානාපතිවරයා මියගියා. නමුත් බොහෝ පාකිස්ථානුවන් විශ්වාස කරන්නේ ගුවන් යානා අනතුර පිටුප​ස සෝවියට් රුසියාව සහ ඉන්දියාව සිටි බවයි. නමුත් පාකිස්ථානයේ ම ඇතැම් පාර්ශව විශ්වාස කරේ මේ පිටුපස ඇමරිකා එක්සත් ජනපදයත් සිටි බවක්. ඔවුන් පවසන්නේ ඇමරිකාවට එල්ල වන සැකය වළක්වා ගැනීමට තමන්ගේ තානාපතිවරයාවත් ඔවුන් බිල්ලට දුන් බවයි.

 

ඉන්දියාවේ දෙවන අගමැතිවරයා වුණු ලාල් බහදුර් ශාස්ත්‍රී මියගියේ උස්බෙකිස්තානයේදී. ඉන්දියාව සහ පාකිස්ථානය අතර ඇති වුණු යුද ගැටුමකදී ඉන්දියාව ජයග්‍රහණය කරා මෙහෙයවූ ශාස්ත්‍රී ඉන්පසුව පාකිස්ථානය වෙත සාමයේ හස්තය දිගු කළා. ඒ අනුව වරක් පාකිස්ථානයේ කෙටි සංචාරයක නිරත වුණු ශාස්ත්‍රී දිගුකාලීන කලාපීය සාමයක් වෙනුවෙන් උස්බෙකිස්තානයේ ටෂ්කන්ට්හි සමුළුවක් පැවැත්වීමට පාකිස්ථාන​යේ අයුබ් ඛාන් සමඟ එකඟතාවයකට පැමිණියා. ඒ අනුව ටෂ්කන්ට් සම්මුතියට අත්සන් තැබුණා. නමුත් ඉන් පැය හතළිස් අටක් ගතවන්නටත් පෙර ශ්‍රාස්ත්‍රී මිය ගියා. ශාස්ත්‍රී ගේ බිරිය පවා විශ්වාස ක​ළේ විෂ ඇතුළු කිරීමක් මගින් ශාස්ත්‍රීව මරණයට පත්කළ බවක්.

 

කතෝලික සභා ඉතිහාසය තු​ළ අඩුම කාලයක් ධූරය දැරූ පාප් වහන්සේලා අතරින් එක් නමක් වන්නේ පළමු ජුවාන් පාවුළු පාප්වහන්සේ. උන්වහන්සේගේ මරණයට හේතුව විදිහට නිල වශයෙන් පිළිගැණුනේ හෘදයාබාධයක්. නමුත් අලුතින් පත් වූ පාප්වහන්සේ මේ විදිහට හදිසියේ මියයෑම පිළිබඳව බොහෝ දෙනාට ඇති වුණේ විමතියක්. වතිකානුව තුළ එවකට ඇතිවුණු දූෂණ මැඩලීමට උන්වහන්සේ ක්‍රියා කිරීම නිසා වතිකානුවේ දූෂිත නිලධාරීන් උන්වහන්සේව විෂ ශරීර ගත කිරීමකින් ඝාතනය කළ බවට ආරංචි පැතිරෙන්නට පටන් ගත්තා. ඒ වගේ ම උන්වහන්සේගෙන් පසුව ඉතාලි ජාතික කාඩිනල්වරුන්ට පමණක් උරුමව තිබූ පාප් පදවිය පෝලන්ත ජාතික කාඩිනල්වරයෙකුට හිමිවීමත් ඇතැම් අයගේ පුදුමයට හේතු වුණා.

 

Sri News Media

LEAVE A REPLY

Please enter your comment!
Please enter your name here